БМТнинг Болалар жамғармаси – ЮНИСЕФ 2019 йил фотосурати танлови ғолибини эълон қилди. Танловда иштирок этган суратлар халқаро ташкилот сайтида жойлаштирилган.
1-ўринни немис фотосуратчиси Хартмут Шварцбахнинг сурати эгаллаган. Унда Манила кўрфазида пластик чиқиндиларни йиғаётган 13 ёшли филиппинлик бола тасвирланган.
Таъкидланишича, ушбу сурат давримизнинг уч фожиасини ўзида акс эттирган: ночорлик, атроф-муҳитнинг ифлосланиши ва болалар меҳнати.
2-ўринни австралиялик Эндрю Куилти афғонистонлик болалар сурати билан эгаллаган. Сурат Афғонистондаги урушнинг аянчли оқибатларини кўрсатиб, унда бомба портлаши оқибатида яраланган 7 бола тасвирланган.
3-ўринни испан фотосуратчиси Антонио Арагон Ренунционинг Буркина-Фасода олтин изловчи болаларнинг азоб-уқубатлари акс этган сурати эгаллаган.