Россияда Ўзбекистонда чиқарилган Ил-114 самолёти ишлаб чиқарилиши йўлга қўйилади  

2020 йилда Россияда Ил-114 ва Ил-96‘нинг модернизация қилинган версияси (Ил-96-300) илк парвозларни амалга оширади. Бу ҳақда “Объединенная авиастроительная корпорация” раҳбари Юрий Слюсарь “Россия-24” телеканалига берган интервьюсида маълум қилди. 

“2020 йил – премьералар йили. Тошкентда ишлаб чиқарилган Ил-114 илк бор ҳавога кўтарилади ва унинг ишлаб чиқарилиши бу ерда - Россияда илк бор ўзлаштирилди. Самолётнинг илк парвози йил бошида бўлиб ўтади. Ил-96-300 самолёти Ил-96’нинг чуқур модернизация қилинган версияси бўлиб, у ҳам келаси йилда ҳавога кўтарилади”, деб маълум қилган Слюсарь. 

Ил-114 самолёти 1980-йилларда ишлаб чиқилган. Ушбу самолётдан Ўзбекистонда 18 дона ишлаб чиқарилган. Самолётни Россияда серияли ишлаб чиқариш 2023 йилга белгиланган. Ундан ҳар йил 12 дона ишлаб чиқарилади. 

Маҳаллий йўналишларга мўлжалланган Ил-114’ни дастлаб серияли ишлаб чиқаришга қўйиш режалаштирилган, бироқ 1990-йилларда бу режа амалга ошмай қолиб кетган.

Ушбу самолётдан 7 таси 2018 йил 1 майгача “Ўзбекистон ҳаво йўллари” томонидан қўлланган.

2014 йилда Россия президенти Владимир Путин Ил-114’нинг Россияда серияли ишлаб чиқарилишини ташкиллаштириш масаласини кўриб чиқиш топшириғини берган. 2017 йилда ушбу моделни МиГ корпорацияси заводида ишлаб чиқаришга тайёргарлик бошлангани маълум бўлган. 

Самолёт 64 йўловчига мўлжалланган бўлиб, унинг учиш узоқлиги 1500 кмни ташкил қилади. Ҳозирда самолётнинг каталог бўйича нархи 16-20 млн долларни ташкил қилади.