Яманда параднинг ракета билан ўққа тутилиши оқибатида 9 киши ҳалок бўлди

29 декабрда Яман ҳукумат кучларининг Ад-Дали шаҳридаги парадига ҳужум қилиниши оқибатида 9 киши ҳалок бўлди, яна бир неча киши яраланди. Бу ҳақда Al Arabiya телеканали хабар берди.   

Ад-Далини назорат қилувчи маҳаллий кучларнинг таъкидлашича, янги жангчиларнинг ўқиши тугаши муносабати билан ўтказилган парад вақтида ҳусийчилар томонидан отилган ракета портлаган.   

Таъкидланишича, қурбонлар орасида 6 жангчи ва 3 бола бор. Яна 20га яқин киши жароҳат олган.

Al Arabiya’нинг хабар беришича, ҳужумдан кейин воқеа жойи яқинида 3 ҳусийчи жангари қўлга олинган. 

Ямандаги қуролли ихтилоф 2014 йил мартидан бери давом этмоқда. Унинг давомида 100 мингдан кўпроқ киши ҳалок бўлган, миллионлаб одамлар ўз уйларини тарк этишга мажбур бўлган.