Трамп Эрдўғанни Ливиядаги вазиятга аралашмасликка чақирди

Фото: REUTERS

АҚШ президенти Дональд Трамп туркиялик ҳамкасби Ражаб Тоййиб Эрдўған билан телефон суҳбатида Ливиядаги вазиятни кескинлаштирмаслик учун унга аралашмасликка чақирди. Бу ҳақда Оқ уй хабар қилди.

Трамп Эрдўғанга Туркия парламенти Ливияга ҳарбийларни жўнатиш ҳақидаги қонун лойиҳасини маъқуллагандан кейин қўнғироқ қилган.

“Президент Трамп суҳбатда хорижий аралашув Ливиядаги вазиятни мураккаблаштиришини таъкидлаб ўтди”, дейилган Оқ уй баёнотида.

2 январда Туркия парламенти Ливияга қўшинларни юборишга рухсат берувчи қонун лойиҳасини қабул қилганди.

Аввалроқ Эрдўған Анқара Ливияда Россиянинг “Вагнер” хусусий ҳарбий компанияси ёлланма жангчилари борлигига “кўз юмиб ўтирмаслигини” айтган. Унинг таъкидлашича, россиялик ёлланма жангчилар Ливиянинг халқаро тан олинган ҳукуматига қарши чиқаётган Ливия миллий армияси қўмондони - маршал Ҳалифа Ҳафтарга ишлайдилар.

#Ливия #Дональд Трамп #Ражаб Тоййиб Эрдўған

2011 йилдан буён фуқаролик уруши ҳолатида бўлган Ливияда вазият янада чигаллашмоқда. Туркия Ливия билан ҳарбий соҳадаги ҳамкорлик асосида Африка шимолига ўз ҳарбийларини йўлламоқда.