Трамп Путинни «АҚШни йўқ қилиб юбора оладиган ягона одам» деб атагани маълум қилинди 

Америкалик журналист Питер Берген ўз китобида АҚШ президенти Дональд Трамп 2017 йилда унга Россия президенти Владимир Путиннинг қўнғироғи ҳақида хабар қилинмаганига қандай муносабат билдиргани ҳақида сўзлаб берди. Бу ҳақда Business Insider нашри маълум қилди. 

Журналист бу ҳақда “Трамп ва унинг генераллари: алғов-далғовлик баҳоси” (Trump and His Generals: The Cost of Chaos) деб номланган китобида манбаларга таяниб сўзлайди. Китобда ёзилишича, 2017 йил 27 январда Трамп Оқ уйда Британиянинг ўшандаги бош вазири Тереза Мэй билан тушлик қилиб ўтирганда Мэй ҳамкасбидан Путин унга қўнғироқ қилган-қилмагани ҳақида сўрайди. АҚШ президенти эса бунга жавобан бошини “йўқ” дегандек қилиб чайқатиб қўйган. Шунда Пентагоннинг разведка бошқармаси директори Майкл Флинн Трампга Путин бир неча кун аввал қўнғироқ қилганини маълум қилади. 

Бунга жавобан Трамп Флинни ва ўз аппаратининг бошқа мансабдор шахсларини қўнғироқ ҳақида маълум қилмаганлари учун койиб кетади. “Сен ҳазиллашяпсанми? Владимир Путин менга қўнғироқ қилишга уринса-ю, сен менга гўшакни тутмасанг? Сен умуман нима ҳақида ўйладинг?”, деб дарғазаб бўлади АҚШ президенти.  

Китобда таъкидланишича, шунда Флинн Оқ уйга охирги кунлар кўплаб қўнғироқлар бўлганини айтиб ўзини оқлашга уринади. Бироқ Трамп уни эшитишни ҳам истамай, Путинни “АҚШни йўқ қила олиши мумкин бўлган Ер юзидаги ягона одам” деб атайди.

Путин ва Трамп ўртасидаги илк телефон суҳбати 2016 йил ноябрда, ўзаро илк учрашув эса 2017 йил 7 июлда Гамбургда “Катта йигирматалик” саммити вақтида бўлиб ўтган.