«Ўзларига қайтаётган уруш реаллиги» – Россия яна дронлар ҳужумига учради

30 июнга ўтар кечаси Украина Россия бўйлаб навбатдаги дронлар ҳужумини уюштирди. Россия мудофаа вазирлиги баёнотига кўра, ушбу ҳужумларда Москва ва Қримдагиларни ҳисобга олганда, жами 419 та дрон уриб туширилган.

Москва мери Сергей Собянин ҳаво мудофааси кучлари пойтахтга яқинлашаётган 60 дан ортиқ дронни уриб туширгани ҳамда фавқулодда хизматлар дрон қулаган жойларида ишлаётганини маълум қилди. У жароҳатланганлар ҳақида гапирмади.

Москва вилояти губернатори Андрей Воробёвнинг сўзларига кўра, ҳужум оқибатида пойтахтдан қарийб 96 км жанубда жойлашган Егоревск шаҳарчасида 6 ойлик чақалоқ ҳалок бўлган. Расмийларга кўра, дрон тушиши оқибатида у ерда ёнғин чиққан. Қутқарувчилар уйда яшовчиларни олиб чиққан, бироқ бола шифохонага кетиш йўлида вафот этган.

Ҳужумлардан сўнг, Россия Федерал авиация назорати органи Москвага хизмат кўрсатадиган йирик аэропортларда қисқа муддатли фавқулодда чекловлар жорий қилди. New York Times'га кўра, бу ҳолат ҳозирда Россия пойтахтида одатий ҳолга айланган. «Росавиация» агентлиги Москвага хизмат кўрсатувчи тўртта халқаро аэропортдан учтаси тунда ўз фаолиятини вақтинча тўхтатишга мажбур бўлганини маълум қилди.

«Россиянинг ўзига қайтаётган уруш ҳақиқати»

Украина расмийлари ушбу ҳужумлар борасида дарҳол оммавий баёнот бермади. Зеленский душанба оқшомида – Москвага зарба берилишидан олдинги мурожаатида Украинанинг дрон ҳужумлари «уруш ҳақиқатини Россиянинг ўзига қайтараётганини» айтди.

Зеленский Россиянинг нефтни қайта ишлаш заводлари, насос станциялари ва экспорт портларига қилинган ҳужумлар нефть саноатига путур етказаётгани қайд этди.

«Биз тажовузкор давлат урушни 'қаердадир узоқда' ушлаб тура олмаслиги учун Украинага керакли натижаларни таъминлаяпмиз», деди Зеленский.

Умуман олганда Украинанинг навбатдаги ҳужуми ҳам – Россия нефтни қайта ишлаш заводлари ва ёқилғи объектларини нишонга олган. Бу кампания бутун Россия бўйлаб бензин тақчиллиги ва ёқилғи қуйиш шохобчаларида навбатларни давом эттирмоқда.

Жанг майдонидаги ва ички вазият

Фронт чизиқлари дронлар билан тўлиб-тошган бир пайтда, Россия Украина шарқидаги жанг майдонида силжишга эришишда қийинчиликка дуч келмоқда, деб ёзмоқда New York Times.

Бу ерда Кремл Донетск вилоятининг қолган қисмини ҳам эгаллашни мақсад қилган. Шу билан бирга оғир жанглар билан кечган май ойидан кейин Россия кучлари яна секин-аста олдинга силжий бошлади. Улар минтақада қолган Украинанинг истеҳкомларини тобора кўпроқ бомбаламоқда.

Бироқ, Украина Россиянинг ичкарисига тобора йирикроқ дрон ҳужумларини амалга оширяпти. Бу билан Путиннинг Россия жамиятини урушдан узоқда (иҳоталанган) ҳолда сақлаш имкониятларини йўққа чиқармоқда.

Нашрнинг ёзишича, Украинанинг дрон ишлаб чиқариши ва технологиясидаги ютуқлар эндиликда Россия томонга каттароқ дронлар тўдасини юбориш имконини беради.

Хусусан, Украинанинг 18 июндаги дрон ҳужумида Москва вилоятидаги йирик нефтни қайта ишлаш заводи нишонга олинган ва пойтахтнинг тўртта аэропорти вақтинча ёпилганди. Россия мудофаа вазирлиги кейинчалик ушбу ҳужум давомида мамлакат бўйлаб қарийб 1000 та дрон уриб туширилганини маълум қилган.

Зеленский ушбу ҳужум Киевдаги тарихий диний мажмуага берилган зарбага жавоб бўлганини айтди. Россия эса мажмуага Украинанинг адашган ҳаво мудофааси ракетаси текканини даъво қилган эди.

Украина президенти Володимир Зеленский ушбу зарбалар кампаниясини «узоқ масофали санкциялар» деб атамоқда. Киевга кўра, уларнинг мақсади "Путинни урушни тугатишга мажбурлаш".

Путиннинг муносабати

Аммо Путин ўз позициясида қатъий турибди. У ўтган якшанба куни бу масалада гапириб, Украинанинг ҳаракатларини – Россияни Донбасс ҳудудларни забт этиш мақсадидан қайтара олмаслигини таъкидлади.

Давлат телеканалига берган интервьюсида у қатъият оҳангида гапириб, «Донбасс ва Новороссиянинг узил-кесил озод этилиши» йўлидан боришини айтди. «Новороссия» атамаси Кремль томонидан 2014 йилда Украина шарқи ва жанубига бўлган ҳудудий даъволарни илгари суриш учун қайта муомалага киритилганди.

Путин Россия инфратузилмасига қилинган ва ёқилғи тақчиллигига сабаб бўлаётган ҳужумлар «муаммолар туғдираётганини» айтди. Лекин, Россиянинг зарбалари ҳалокатлироқ, бўляпти, деди:

«Ҳозирда биз маълум бир тақчилликни кўряпмиз, гарчи улар ўта оғир даражада бўлмаса ҳам. Бизнинг Украина ҳудудининг ичкарисига бераётган жавоб зарбаларимиз анча кучлироқ, самаралироқ ва очиғи, ҳалокатлироқ бўлиб, ҳақиқатан ҳам жиддий оқибатларга олиб келмоқда», деди Путин интервьюда.