БАА бош вазири, вице-президенти, Дубай амири Муҳаммад бин Рашид Ол Мақтум ва Абу-Даби валиаҳд шаҳзодаси, БАА қуролли кучлари олий қўмондони ўринбосари Муҳаммад бин Зоид Ол Наҳаён Бирлашган Араб Амирликларининг кейинги 50 йил учун янги логотипини тақдим қилди.
“Бугун мен, менинг иним Муҳаммад бин Зоид ва амирликларнинг 49 нафар инноватори БАА учун янги логотипни тақдим этмоқдамиз. Ушбу логотип ўзидан харитамиз, бизнинг ўсиб бораётган интилишларимиз, олдинга олға бораётган 7 амирлик, тарихга кирган 7 асосчини акс эттиради”, деб ёзган Дубай амири твиттерда.
Янги логотип овоз бериш йўли билан танланган. У учун 10 млндан кўпроқ одам овоз берган. Бунга миннатдорлик сифатида амирликларда 10 млнта дарахт экилади. Таъкидланишича, эндиликда БААнинг барча муассаса ва ташкилотлари янги логотипдан фойдаланишни бошлайди.
