БАА билан “Сифатли давлат бошқаруви” дастури йўлга қўйилади

Ўзбекистонда давлат бошқаруви самарадорлигини ошириш ва ижро этувчи ҳокимият органлари фаолиятини баҳолашнинг янги тизими жорий этилади. Бу Президентнинг “Бирлашган Араб Амирликлари билан ҳамкорликда “Сифатли давлат бошқаруви” дастурини амалга ошириш чора-тадбирлари тўғрисида”ги фармойишида белгиланди.

Фото: REUTERS

Мазкур фармойишга кўра, Ўзбекистон Республикаси ва Бирлашган Араб Амирликлари ўртасидаги икки томонлама келишувлар доирасида “Сифатли давлат бошқаруви” дастури амалга оширилади.

Ҳужжат билан Стратегик ривожланиш ва ислоҳотлар агентлиги ҳамда Бошқарув самарадорлиги агентлиги дастурни амалга ошириш учун масъул органлар этиб белгиланган.

Шунингдек, 2026 йилдан бошлаб ҳар икки йилда республика ижро этувчи ҳокимият органлари — вазирлик, қўмита, агентлик ва инспекциялар фаолияти самарадорлигини дастур асосида баҳолаш тизими жорий этилади.

Дастурда иштирок этувчи республика ва маҳаллий ижро этувчи ҳокимият органлари, шунингдек, мукофот номинациялари рўйхатлари Агентлик ва Бошқарув самарадорлиги агентлиги томонидан тасдиқланади.