Самарқандда АҚШ консуллиги очиладими? Дэниел Розенблюм жавоб берди

28 январь куни Самарқандга ташриф буюрган АҚШнинг Ўзбекистондаги элчиси Дэниел Розенблюм журналистлар билан мулоқот ўтказиб, уларни қизиқтирган саволларга жавоб берди.

Мулоқот давомида жаноб Розенблюм Ўзбекистондаги очиқлик, демократия йўлидаги ўзгаришларни олқишлади: «Юртингиздаги очиқлик ва демократиядан биз ҳам манфаатдормиз. Қандай дейсизми? Ҳар қандай мамлакатдаги шаффофлик барқарорликка олиб келади ва биз айнан шунинг тарафдоримиз. Ўзбекистондаги ижобий ўзгаришлардан аввал ҳам хабардор эдим, аммо элчилик фаолиятимни бошлагач, тасаввурларим кенгая борди».

АҚШ элчиси Ўзбекистондаги ўзгаришларни эътироф этаркан, бу йўлда ҳали мураккабликлар ҳам бўлиши мумкинлиги ҳақида гапирди. Розенблюм Ўзбекистондаги демократик ўзгаришларда ОАВнинг ўрни ҳақида журналистларнинг фикри билан қизиқди.

Мулоқот давомида Ўзбекистонда фуқаролар ва тадбиркорларнинг мулк ҳуқуқини таъминлаш, Самарқанд шаҳрининг тарихий қисмида ноқонуний тарзда кўп қаватли бинолар қурилишининг олдини олиш каби масалаларда  ОАВ ҳамда жамоатчиликнинг ютуқлари муҳокама этилди.

ОАВ вакиллари билан учрашувда қатнашган Kun.uz мухбири Самарқандда яқинда Франция консуллиги очилгани, АҚШда ҳам бу борада режалар бор-йўқлиги ҳақида жаноб Розенблюмдан сўради. АҚШ элчиси ҳозирча Самарқандда консуллик очиш кўзда тутилмагани, аммо мамлакатнинг бир нечта ҳудудларида «Америка бурчаклари» очиш режалаштирилганини айтди. Унинг айтишича, бундай марказларда одамлар АҚШ билан боғлиқ турли саволларига жавоб олиши мумкин бўлади.

Ташриф давомида Дэниел Розенблюм вилоят ҳокимлиги ҳамда Имом Бухорий халқаро илмий-тадқиқот марказида давлат ва жамоат ташкилотлари вакиллари билан ҳам учрашув ўтказди.