АҚШда илк марта коронавируснинг одамдан одамга юқиши қайд этилди

АҚШда янги коронавирусга чалиниш бўйича олтинчи ҳолат қайд этилди. Илк марта вируснинг одамдан одамга юқиши кузатилди. Бу ҳақда АҚШ санитария идораси маълум қилди.

Фото: AP Photo / Mel Evans

Сўнгги маълумотларга кўра, Хитойда Ухань шаҳрида тарқалишни бошлаган коронавирусдан ҳозиргача 170 киши вафот этди, вирусни юқтириб олганлар сони 7711 нафарни ташкил этмоқда, бошқа мамлакатларда ҳам вирусни юқтириб олганлар сони қўшиб ҳисобланганда бу кўрсаткич 7894 кишига етган. Инфекция Хитойдан ташқари яна 16 мамлакатда қайд этилган.

Жаҳон соғлиқни сақлаш ташкилоти (ЖССТ) коронавирус тарқалиши жадаллашгани сабабли фавқулодда қўмитасининг махсус йиғилишини чақиртирган. Йиғилиш ташкилотнинг Женевадаги бош қароргоҳида бўлиб ўтади.

ЖССТ директори Тедрос Аданом Гебреисус ташкилотдагилар вирус Германия, Вьетнам ва Японияда Хитойга бормаганларга ҳам юққанидан ташвишдалигини билдирган.

«Хитойдан ташқарида бу вирус одамдан одамга юқиши билан боғлиқ ҳолатлар жуда кам бўлса ҳам, глобал эпидемия юзага келиши хавфи мавжуд», - деган у.

#АҚШ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.