2020 йил 1 апрелдан бошлаб ИИВ ҳузурида яна бир жамғарма фаолият юрита бошлайди

Ўзбекистон Республикаси Президентининг 2018 йил 24 декабрдаги ПҚ–4075-сон “Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида”ги қарорига қўшимча киритиш ҳақидаги ҳужжат лойиҳаси муҳокама учун жойлаштирилди.

Юқоридаги қарор қуйидаги таҳрирдаги банд билан тўлдирилади:

“2020 йил 1 апрелдан бошлаб Ўзбекистон Республикаси Ички ишлар вазирлиги ҳузурида юридик шахс ташкил этмаган ҳолда Ҳуқуқбузарликлар профилактикаси бўлинмаларининг моддий-техник базасини ривожлантириш жамғармаси (Республика жамғармаси) ташкил этилсин.

Белгилансинки:

а) Республика жамғармасини шакллантириш манбалари қуйидагилар ҳисобланади:

жамғармаларнинг вақтинча бўш турган маблағларини тижорат банклари депозитларига жойлаштиришдан тушадиган даромадлар;

халқаро молия институтлари ва бошқа хорижий донорларнинг грантлари ҳамда қонунчилик билан тақиқланмаган бошқа манбалар;

б) Республика жамғармаси маблағлари Ички ишлар вазирлиги Ҳуқуқбузарликлар профилактикаси бош бошқармаси бошлиғининг асослантирилган хулосасига мувофиқ, Ўзбекистон Республикаси ички ишлар вазирининг қарорига асосан ички ишлар органлари ҳуқуқбузарликлар профилактикаси бўлинмаларининг моддий-техник базасини мустаҳкамлаш учун сарфланади.”.

Ўзбекистон Республикаси Ички ишлар вазирлиги бошқа манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштириши мўлжалланган.