Форма ортидаги схема: Самарқандда лейтенант миллион долларлик ишда гумонланмоқда

Тагида патрул хизмат машинаси, эгнида форма ва чўнтакда “ички ишлар ходими” деган гувоҳнома. Булар одатда қонун ҳимоячисининг атрибутлари. Аммо Самарқандда бу воситалар миллионлаб долларлик фирибгарлик қуролига айланди.

Тойлоқ туманида ўнлаб, балки юзга яқин инсон бир одамга ишониб алданиб қолган – у ички ишлар бошқармаси йўл ҳаракати хавфсизлиги ходими, лейтенант Бунёд Яздонов. Ходим Бухорода қурилиш лойиҳаси борлигини айтиб, одамлардан пул олган.

Ваъда оддий бўлган: пулингиз ёки мулкингизни берасиз, фойдаси билан қайтариб оласиз. Аммо воқеалар ривожи бутунлай жиддийлашиб кетди, лейтенант тўхташни унутиб қўйди.

Kun.uz ҳолат бўйича суриштирув олиб борди.

Лейтенант Бунёд Яздоновдан энг кўп жабрланганлардан бири – машина савдоси билан шуғулланувчи Шаҳриёр Облоқулов. Унинг айтишича, Яздоновга аввало қишлоқдоши экани ва ички ишлар тизимида ишлаши сабабли ишонган.

Дастлаб инспектор олган қарзларини ўз вақтида қайтариб келган. Бу эса ишончни янада мустаҳкамлаган. Облоқулов аввал ўзининг бир нечта автомобилларини, кейин эса танишларидан ҳам пул ва машиналар олиб, Яздоновга берган.

Бироқ 2025 йил кузига келиб вазият ўзгарган, қарзларни қайтариш муддати чўзила бошлаган. Шу орада Яздонов бошқа кўплаб одамлардан ҳам худди шу тарзда қарз олгани маълум бўлган.

“Яздонов ва унинг “опахони” Шаҳноза Хушмуродова менга гаров сифатида уй ва дўкон ҳужжатларини берганди. Кейин уларнинг барчаси сохта экани аниқланди. Олди-бердиларимизни Бунёднинг ўзи тасвирга олиб берган, гапларимга асосим бор. Ҳозир мендан Бунёднинг 258 минг, Шаҳноза Хушмуродованинг эса 35 минг АҚШ доллари қарзи бор”, – дейди Облоқулов.

Жабрланувчиларнинг айтишича, ишонч айнан унинг формаси ва лавозими орқали пайдо бўлган. Одамлар уни оддий одам эмас, давлат тизими вакили сифатида қабул қилган.

Жабрланувчилардан бири Афзал Ғаниевнинг айтишича, Яздонов қарз олди-бердиларида ҳатто ўз хизмат гувоҳномасини ҳам ишлатиб, ундан гаров сифатида фойдаланган.

“Яқингача Бунёднинг хизмат гувоҳномаси қўлимда эди – қарзини бермагани учун ҳужжатни олгандим. Кейин йўл ҳаракати хавфсизлиги бошқармасидан қўнғироқ қилиб, гувоҳномани топширишимни, акс ҳолда жавобгарликка тортилишим мумкинлигини айтишди. Шундан сўнг ҳужжатни қайтардим.

Ҳозир Бунёднинг мендан қарзи 70 минг АҚШ долларини ташкил қилади”, – дейди Ғаниев.

Тилга олинган рақамлар бу ишнинг ҳақиқий кўламини кўрсатади. 120 минг доллар... 70 минг доллар... Ва яна ўнлаб шундай ҳолатлар. Шу каби қарзлар йиғилиб, умумий сумма долларда миллионларга етгани айтилмоқда. Аниқ рақамлар ҳозирча маълум эмас.

Бунёд 2025 йилнинг сентябр ойларида ҳам пул йиғишда давом этган. Аммо айнан шу пайтдан бошлаб вазият ўзгарган. Пуллар қайтарилмаган, натижада ҳақдорларда саволлар кўпайиб борган. Қарз берганлар шубҳалана бошлайди ва вазият ойдинлашади: улар катта эҳтимол билан пулларини қайтариб ололмаслигини англаб етишади. Бу вақтга келиб Бунёднинг “пирамидаси”га аллақачон ўнлаб одамлар илиниб бўлганди.

Ушбу воқеада яна бир қаҳрамон бор. Жабрланувчилар уни Бунёднинг “опахони” деб атайди. Жабрланувчилар билан бўлган мулоқотлардан англашилишича, айримлар уни бу ишда асосий одам деб ҳисоблайди.

Тақдим этилган аудиоларда “опахон” қарзлар бўйича масъулиятни ўз зиммасига олишини айтган: “Мен сизга пул бераман… Бунёд қочиб кетса, қарзини мен тўлайман”.

Бироқ кейинги суҳбатларда у яна маблағ излаш ва “рискли” келишувларга киришганини ҳам тан олади: “Ҳозир битта рискованний иш қиляпман… 100 минг усти бор деяпти…”

Яна бир ўринда аёл: “Агар Бунёд кирса, мен бировга бир тийин бермайман”, деганини эшитиш мумкин.

Жабрланувчиларнинг айтишича, ўша аёл лейтенантнинг тергов ишини Тошкентга кўчириши, унинг устидан ариза қилингани учун пул бермаслигини билдирган. “Опахон” очиқда ва у терговга қай даражада жалб этилгани ҳозирча бизга номаълум.

Воқеа Самарқандда содир бўлган бўлса-да, иш Тошкент вилоятида кўрилмоқда. Расмийлар бу ҳаракат холисликни таъминлаш учун қилинганини айтмоқда. Аммо жабрланувчилар учун бу қарор қўшимча қийинчиликлар туғдирмоқда.

Самарқанд вилояти Ички ишлар бошқармасининг маълум қилишича, 2025 йил 12 ноябр куни Бунёд Яздонов хизматдан бўшатилган. 2026 йил январ ойида эса унга нисбатан Жиноят кодексининг 168-моддаси (фирибгарлик) билан жиноят иши қўзғатилган ва тергов ҳаракатлари олиб борилмоқда.

Тергов бошланганига 3 ойдан ошиб кетганига қарамай, жабрланувчиларга ҳалигача аниқ гап айтилмаяпти. Қарз берганлар даромадидан айрилган, соғлиғини йўқотган, оиласида нотинчлик юзага келмоқда.

Kun.uz воқеалар ривожини кузатишда давом этади ва мавзуга яна қайтади.