Коронавирус: Швейцарияда йирик тадбирлар тақиқланди, Женева автосалони бекор қилинди

Бу ҳақда автосалон сайтида маълум қилинди. 

Жорий йилда автосалон юбилей сонда – 90-марта ўтказилиши керак эди. 

Фармойишга кўра, мамлакатда иштирокчилари минг кишидан ошадиган оммавий тадбирларни ўтказиш тақиқланади. Тақиқлов камида 15 мартгача амал қилади.

“Биз бу вазиятдан афсусдамиз, бироқ тадбир иштирокчилари саломатлиги биз учун ҳаммасидан устун. Бу эса автосалонда иштирок этиш учун катта маблағ сарфлаган ишлаб чиқарувчилар учун катта йўқотишларни англатувчи форс-мажор ҳолатдир. Бироқ биз улар бу қарорни тўғри қабул қиладилар, деб ишонамиз”, деб айтган автосалон васийлик кенгаши раиси Морис Турреттини. Унинг таъкидлашича, юзага келган вазиятда кўргазма иштирокчилари автосалон бекор қилиниши натижасида кўрилган зиённинг қопланишига умид қилмасликлари керак.

Ташкилотчиларнинг маълум қилишича, гап жорий йилда кўргазманинг бошқа санага кўчирилиши эмас, балки тўлиқ бекор қилиниши ҳақида бормоқда. 

Женева автосалони 3 март куни матбуот учун янги машиналар намойиши билан бошланиши керак эди. 

Аввалроқ коронавирус сабабли апрель охирида ўтиши керак бўлган Пекин автосалони бекор қилинганди. Шунингдек, “Формула-1” автопойгасининг 17-19 апрелга белгиланган Шанхайдаги босқичи номаълум муддатга қолдирилди.

Охирги маълумотларга кўра, Швейцарияда коронавирусга чалинганлар сони 9 нафаргача етди. Мамлакатнинг Базель-Сити кантонида бир неча бола тарбиячилардан бирида вирус аниқлангач, 2 ҳафталик карантинга жойлаштирилган.