Исроилда бир йил ичида учинчи парламент сайловлари бўлиб ўтмоқда. Президент буни шармандалик деб атади

Аввалги сайловлар натижаларига кўра ҳукумат коалициясини тузишга муваффақ бўлинмаган. Бундай ҳолат мамлакатнинг 72 йиллик тарихида илк бор юзага келган. Жорий сайловлар натижаларига кўра кнессетга сайловда ғолиб бўлган партия етакчиси парламентда кўпчилик коалициясини тузишга ҳаракат қилиб кўради. Бунинг учун у парламентнинг 120 нафар янги депутатидан камида 61 нафарининг қўллаб-қувватловини олиши керак.  

Асосий кураш Исроил бош вазири Биньямин Нетаньяхунинг “Ликуд” партияси ва Бени Ганцнинг мухолиф блоки “Кахоль-Лаван” ўртасида кечиши кутилмоқда.

Исроил президенти Реувен Ривлин исроилликлар сайлов участкаларига учинчи марта боришларига тўғри келаётганидан афсус билдирган. “Сизга айтишим керак, бугун мен хурсандчиликдан анча йироқ туйғуни ҳис қилмоқдаман. Менинг ҳис-туйғуларим тўғрироғи шармандаликни эслатмоқда. Азиз фуқаролар, сизнинг олдингизда уятдаман. Биз бунга лойиқмасмиз, биз бадбўйликка қараб кетаётган яна бир сайловолди кампаниясидан яхшироғига муносибмиз”, деб айтган президент.    

Исроил бош вазири исроилликлар овоз бериш каби “демократик ҳуқуққа эга эканликларидан” мағрурланишлари кераклигини айтиб, уларни коронавирус тарқалиши билан чақирилган ваҳимага эътибор қаратмай, овоз беришда иштирок этишга чақирган. “Фейк янгиликларга эътибор берманг, хавотирга берилмай ва фахр билан сайловга боринг ва овоз беринг”, деб айтган Нетаньяху.  

Ушбу сайловлар Нетаньяхуга қарши учта коррупция иши бўйича суд жараёни бошланишига саноқли кунлар қолганда ўтмоқда. Суд жараёни 17 март куни бошланади. Исроил прокуратурасининг таъкидлашича, бош вазир тадбиркорлардан совғалар олган ва бунинг эвазига уларнинг илтимосларини бажарган.