Тергов маълумотига кўра, МЧЖ фаолиятини 10 миллион сўм билан бошлаб, устав фондини шакллантирмаган.
2 март куни айни масала юзасидан Интерпол миллий марказий бюросида матбуот анжумани бўлиб ўтди. Унда «Avto 60 oy» раҳбари Жамшид Баҳодировнинг онаси Малоҳат Зокирова ҳам қатнашиб, йиғилганларга мурожаат қилди.
«Сизлардан ёрдам сўрайман, ҳеч кимнинг пулини еб кетмайди. Ҳамма пулларинг «Avto oltmish oy»нинг ҳисобида турибди. Пулларингни қайтаради. Ўзи қийналгани учун, халққа ёрдам бериш учун бу ишларни қилган. Агар жиноят қилган бўлса, жинояти суд давомида кўриб чиқилади.
У эҳсонлар қилган, меҳрибонлик уйларига хайриялар берган. Лекин бировларнинг пулини еб кетган жойи йўқ. Болам сизларга зарар етказган бўлса, ҳаммаларингдан узр сўрайман. Худо хоҳласа, суддан эсон-омон чиқса, пулларингни қайтариб беради», деди у.
Онанинг сўзларига ИИВ Тергов департаменти бўлим бошлиғи Азизбек Долихўжаев муносабат билдирди.
«Сиз ҳозир етказилган зарарнинг ҳаммаси қоплаб берилади, деб айтяпсиз. МЧЖ ҳисоб рақамидаги пуллар ва мол-мулклар 34 миллиард сўмни ташкил қиляпти. Одамлардан эса 57 миллиард сўм жалб қилинган. Қолган маблағлар қаерда?
Жамшид Баҳодировда 18 минг 818 нафар одамга худди шунча автомашина етказиб бериш мажбурияти бор. Шунча фуқародан 96 нафари транспорт воситаси олган холос. Қолганларга қайси пул маблағлари ҳисобидан автомашина қилиб беради? У фаолиятини 10 миллион сўм билан бошлаган. Устав фондини шакллантирмаган.
Эҳсон қилишдан олдин 18 минг нафардан ортиқ одам олдидаги мажбуриятини бажариши керак. Агар фаолиятида фойдага кирса, сўнгра хайриялар қилиши мумкин. Аммо шартнома бўйича мажбуриятини бажармай туриб, фуқаролардан олинган пулларни хайрияларга сарфлашга ҳаққи йўқ», – деди Долихўжаев.
Малоҳат Зокирова тергов пайтида ўғлига тазйиқ ўтказилганини айтмоқда – иддао ўз исботини топмаса, у жавобгарликка тортилиши мумкин.
«Тергов жараёнида боламга нисбатан тазйиқлар бўлди. Ўғлимни менга ёзган хатида ёзилишича, 4 ноябрдан 5 ноябрга ўтар кечаси «Тоштурма»дан олиб келишган. Ўшанда тазйиқ ўтказишган.
Наркология диспансеридан ҳам одам олиб келишган экан. Ўша ерда Алишер «опер» ва Фарҳод Эргашев бўлган. Алишер «опер» ўғлимдан 900 минг доллар талаб қилган.
«900 минг доллар берсанг, сени суддан чиқариб юборамиз. Пулни фалончи, фалончиларга берамиз», деган. Ўғлим шу гапларни 2-3 варақли хатида ўзидан-ўзи ёзмаса керак. Лекин бу бўйича оддий текширув бўлди, тезда ёпилиб кетди.
Биз оддий камбағал фуқаролар қолиб кетаверамиз. «Straus House» таъсисчисидан ҳам 1 миллион доллар сўрашган экан. У бола ҳам бўлмаган гапни айтмаса керак.
Бу ҳолатлар бўйича ҳамма жойга мурожаат қилдим. Сизларга ҳам кўп маротаба хат ёздим. Ёзмаган жойим қолмади. Тергов департаменти текшириб, кўриб чиқяпти, деган жавобни олдим. Терговчи, «опер»ларга нисбатан нима чора кўрдиларингиз? Қани шуни айтинглар?» – деди Малоҳат Зокирова.
ИИВ Тергов департаменти бўлим бошлиғи Азизбек Долихўжаев бу саволларга жавобан айтишича, Жамшид Баҳодиров тергов идорасига жиноят иши қўзғатилиб, вилоятлардаги офисларида тинтув ўтказилганидан кейин келтирилган. Шундан сўнг унга нисбатан гумонланувчи тариқасида чақирув қарори эълон қилиниб, сўроқ қилинган.
Тергов жараёнлари тўлиқ видеога ёзиб олинган.
«Жамшид Баҳодиров билан боғлиқ тергов ҳаракатлари ҳимоячилари иштирокида амалга оширилган. Унинг битта эмас, икки-учта ҳимоячилари бор.
Қолаверса, ҳозир ҳар бир тергов хоналари кузатув камералари билан жиҳозланган. Ўғлингиз сақланаётган вақтинча сақлаш ҳибсхонасида ҳам камералар ўрнатилган. Улар 24 соат тўхтовсиз видеотасвирга олади. Мурожаатингиз бўйича хизмат текшируви ўтказилган ва ўз тасдиғини топмаганлиги боис қаноатлантириш рад қилинган», – деди Азизбек Долихўжаев.
Тергов департаменти бошлиғи ўринбосари – Жиноятларни тергов қилиш бошқармаси бошлиғи Ойбек Қулбеков ушбу иддаолар бўйича қайтадан хизмат текшируви тайинланишини маълум қилди.
«Бу бўлмаган гап. Шунга қарамай бу бўйича хизмат текшируви тайинлаймиз. Воқеа 4 ноябрдан 5 ноябрга ўтар кечасида бўлгани айтилди, видеоархивни кўтартирамиз. Вақтинчалик ушлаб туриш ҳибсхонасининг ҳамма видеокамераларидаги ёзувларни ўрганмиз. Одилона, адолатли қарор қабул қиламиз.
Оғзаки айбловлардан воз кечайлик. Аниқ далилларингиз бўлса беринг, кунлари, жойларини айтинг, суриштириб тагига етамиз. Келинг, ҳаммасини очиқчасига қиламиз. Хизмат текшируви ўтказилади. Ҳибсхонага ким кирган, ким чиққан – ҳаммасига ойдинлик киритилади.
Бу жараёнга ОАВни ҳам таклиф қиламиз. «Straus House» таъсисчисининг терговчилар 1 млн доллар талаб қилгани ҳақидаги асоссиз айбловидан кейин 900 млн (900 минг доллар демоқчи – таҳр.) доллар сўралгани ҳақидаги гап-сўзлар пайдо бўлди. Бунга нуқта қўйишимиз керак. Биз ҳам ўзимизнинг қонунда белгиланган ҳуқуқларимиздан фойдаланиш вақти келди, деб ўйлайман», дейди у.
Ойбек Қулбековнинг таъкидлашича, фуқаро Малоҳат Зокированинг айтган гаплари тасдиғини топса, айбдорларга нисбатан қонунда белгиланган тартибда чора кўрилади. Агар бу гап асоссиз бўлиб чиқса, унинг ўзи жавобгарликка тортилади.
«Болам бу ишларни бошлаганида ёмон ниятда бўлмаган. Отасизликда ўстирганман. Халққа фойдаси тегиши учун, халқ ҳожатини чиқариш учун очган бу фирмани. Балки нотўғри иш қилгандир, хато қилгандир ўқимагани учун, коллежни битиргани учун.
Ўғлим фаолиятини энди бошлаганида, ишхонасида текширув бўлган. Алишер «опер» бориб, текширув ўтказган. Ҳамма ҳужжатлари тўғрилигини исботлаб беришган. Шунда ҳам боламни тинч қўйишмади.
Терговга келганимда Фарҳод Эргашев «Ўғлингизни тўрт маротаба чақирганмиз, қулоқ солмаган», деб бир неча марта айтди. Нима учун фирма 12та вилоятда офисларини очиб, ишлари катталашиб кетгунга қадар бирор киши индамади?! Нима сабабдан қамаб қўйишган, 5 ойдан бери қамоқ жазосида», – дейди Малоҳат Зокирова.
- 19 мингга яқин мижоздан 57 миллиард сўмдан ортиқ пул йиғилган – «Авто 60 ой» иши бўйича янги тафсилотлар
- «Авто 60 ой»дан олинган машиналар хатланиши мумкин
- «Авто 60 ой» МЖЧ раҳбари шунчаки «фигурант» бўлганми? — Тергов департаменти изоҳ берди
Эслатиб ўтамиз, 2019 йилнинг октябрида «Avto oltmish oy» МЧЖ мансабдор шахслари ва бошқаларга нисбатан Жиноят кодексининг 188-1-моддаси 1-қисми, яъни пул маблағларини ва бошқа мол-мулкни жалб этишга доир ноқонуний фаолиятини текшириш мақсадида жиноят иши қўзғатилганди.
Жиноят иши қўзғатилишига UzAutoMotors АЖнинг ИИВга ушбу МЧЖнинг шубҳали фаолият кўрсатаётганини билдириб йўллаган мурожаати юзасидан терговга қадар суриштирув вақтида аниқланган ҳолатлар асос бўлган.
Тергов маълумотига кўра, «Avto oltmish oy» МЧЖ таъсисчиси ва бошқа мансабдорлари фуқароларга фоизсиз, пулини 5 йил давомида бўлиб-бўлиб тўлаш шарти билан автотранспорт олиб беришни ваъда қилиб, одамлардан транспорт воситаси турига қараб 2 млн сўмдан 10 млн сўмгача пул олган, 19 мингга яқин мижоздан жами 57 миллиард 412 миллион сўм йиғилган.
Жабрланувчиларга етказилган умумий зарарнинг ундирилган қисми 34 миллиард 148 миллион сўм бўлиб, шундан нақд пул шаклидагиси 26 миллиард сўм, хатланган мол-мулклар эса 8 миллиард 148 миллион сўмдан иборат. Камомад 23 млрд 264 млн сўмни ташкил этмоқда.
Тергов департаменти «Avto oltmish oy» МЧЖ раҳбари Жамшид Баҳодиров жиноий схемани бир ўзи ўйлаб топишга қодир эмаслигини таъкидлаган. Унинг жиноий шериклари бор ва айни вақтда уларнинг сонини аниқлаш давом этмоқда.
Ушбу иш бўйича гумонланувчилар эҳтиёт чораси сифатида қамоқда сақланмоқда, бир нафар гумонланувчига нисбатан «гаров» эҳтиёт чораси қўлланган. Ҳужжатли тафтиш якуни бўйича қолган шахслар ва жамиятнинг вилоятлардаги филиалларидаги менежер ҳамда кассирларининг ҳаракатларига ҳуқуқий баҳо берилиши айтилмоқда.
«Avto oltmish oy» МЧЖ раҳбари ва бошқа мансабдорларига нисбатан қўзғатилган жиноят ишини тергов қилиш учун белгиланган муддат 7 ойгача, яъни 2020 йилнинг май ойигача узайтирилиши кутилмоқда. Ҳозиргача мазкур жиноят иши бўйича қарийб 17 минг фуқаро сўроқ қилинган. Жабрланувчилар тўлиқ сўроқ қилиниб, зарар миқдори аниқлангандан кейингина тергов якунланади ва иш судга оширилади.
