Ҳукумат Афина ва Салоникида мигрантларни сақлаб туриш учун ёпиқ марказлар ташкил этиш масаласини кўриб чиқмоқда
Греция ҳукумати мамлакатга 1 мартдан кейин келган мигрантларни депортация қилишни режалаштирмоқда. Бу ҳақда Греция ҳукуматининг расмий вакили Стелиос Пецас маълум қилди.
Унинг қайд этишича, 1 мартдан бошлаб мамлакат ҳудудига ноқонуний равишда кириб келган мигрантлар тўғрисидаги маълумотлар қайд этилмайди ва улар бошпана беришни сўраб мурожаат қила олмайди.
"Ноқонуний ўтганлар ёпиқ марказларга жойлаштирилади ва уларни депортация қилиш жараёни бошланади. Ҳукумат ҳозирда Афина ва Салоникида ёпиқ марказлар ташкил этиш масаласини кўриб чиқмоқда", - деди Пецас.
Ҳукуматдаги манбаларнинг маълумот беришича, 29 февралдан 5 мартгача Грецияга ноқонуний ўтиш учун қилинган 34 минг 778та уринишнинг олди олинган. Жами 244 киши ҳибсга олинган.
Ўтган ҳафтада Туркия мигрантларнинг янги тўлқинини тутиб тура олмаслигини билдириб, қочқинлар учун ЕИ билан чегараларини очиб юборганини маълум қилди. Шундан сўнг минглаб мигрантлар Европага ўтиш илинжида Греция чегарасига ёпирилди.
Эрдўған Суриянинг Идлиб провинциясида авиазарбалар натижасида 30 нафар турк ҳарбийси ҳалок бўлганидан сўнг чегарани очишга қарор қилди.
