Испаниянинг тахтдан воз кечган собиқ қироли тадбиркорга таҳдид қилишда айбланиши мумкин

Германиялик тадбиркор аёл Коринна цу Сайн-Витгенштейн Лондон судида 2014 йилда Испания қироллиги тахтидан воз кечган Хуан Карлос I’ни таҳдид қилишда айбламоқчи. Бу ҳақда Europa Press агентлиги хабар берди.

Хуан Карлос I Фото: Reuters

Хабарда айтилишича, 2012 йилда, унинг Хуан Карлос I билан эҳтимолий муносабатлари тўғрисида хабарлар тарқалганидан сўнг аёлга нисбатан таҳдидлар бўлган. Сайн-Витгенштейндан ўзи билиши мумкин бўлган давлат сирларини ошкор этмаслик талаб қилинган. Тадбиркор миллий разведка марказининг собиқ директори Феликс Санс Рольданни ҳам судга бермоқчи.

Аввалроқ Сайн-Витгенштейнга тегишли эканлиги айтилган аудиоёзув пайдо бўлганди. Уни 2015 йилда собиқ полиция инспектори Хосе Мануэл Вильареха ёзиб олганлиги тахмин қилинган. Аудиоёзувда тадбиркор тахтдан воз кечган қирол ундан ўзининг хориждаги мулкларини яшириш учун фойдаланганини айтади.

Okdiario газетасининг қайд этишича, Сайн-Витгенштейннинг сўзларига кўра, Хуан Карлос I Макка-Мадина йўналишидаги тезюрар поезд йўлини қуриш бўйича шартнома Испания компаниялари консорциумига тегиши учун Саудия Арабистони билан музокараларда воситачилик қилиш эвазига ҳақ олишга уринган.