Эронда “коронавирусдан дори” сифатида метил спирти қабул қилган 27 киши ҳаётдан кўз юмди

Эрон расмийлари ва шифокорлар маълумотларига кўра, қалбаки спиртли ичимлик қабул қилишдан заҳарланган 218 кишидан 27 нафари ҳаётдан кўз юмган.

Жумладан, Эроннинг жанубидаги Ҳузистон вилоятида 20 киши, Албўрз вилоятида эса 7 киши метил спиртдан заҳарланиш оқибатида жон берган. 

Эронда охирги ҳафталарда коронавирус эпидемияси ортида сиртларни вируслардан зарарсизлантиришда қўллаш учун метил спирти ишлаб чиқариш фаоллашган. Метанолни дўконларда бемалол харид қилиш мумкин. Қоидага кўра, у ичиладиган суюқликлардан фарқланиши учун зарғалдоқ рангда бўлади.

Вафот этганлар эса коронавирусдан ҳимояланиш мақсадида ушбу спиртни истеъмол қилишга қарор қилишган.

9 март кунига кўра, Эронда коронавирусга чалиниш бўйича 7161 та ҳолат қайд этилган, улардан 237 таси ўлим билан тугаган, 2,4 минг киши соғайиб кетган. 

Жаҳон соғлиқни сақлаш ташкилоти коронавирусни спиртли ичимликлар билан даволаш мумкинлиги ҳақидаги миш-мишларни рад этиб келмоқда.

Таъкидланишича, спиртли ичимликлар вирусга чалинишнинг олдини ололмайди. Ундан фақатгина сиртларни зарарсизлантиришда фойдаланиш мумкин. Спирт ёки хлорли сувни бутун танани дезинфекция қилишда қўллаш ярамайди, чунки у зиён етказиши мумкин.

Бироқ тиббиётчиларнинг огоҳлантиришига қарамай, аксарият кишилар спиртли ичимликларнинг оз миқдорларда мунтазам қабул қилиниши коронавирусдан сақлайди, деб ўйлайди. 

Айни вақтда спиртли ичимликлар ёрдамида коронавирусдан сақланиш мумкинлиги ҳақида ишончли маълумотлар йўқ. Бироқ касалликка чалинганларга алкогол нафақат бефойда, балки хавфлидир, чунки яллиғланиш жараёнларини зўрайтириб юбориши мумкин.