ЕХҲТ журналистлар ҳуқуқини таъминлашда Ўзбекистондан ўрнак олишга чақирди

Европада хавфсизлик ва ҳамкорлик ташкилоти (ЕХҲТ)нинг ОАВ эркинлиги масалалари бўйича вакиллиги офисининг расмий сайтида жорий йилнинг 5-6 март кунлари Самарқанд шаҳрида бўлиб ўтган II Марказий Осиё судьялар мулоқоти натижалари бўйича пресс-релиз эълон қилинди.

Ушбу чиқишда ЕХҲТнинг ОАВ эркинлиги масалалари бўйича вакили Арлем Дезир Ўзбекистонда сўз эркинлигини таъминлаш соҳасида амалга оширилаётган ишларни қўллаб-қувватлашини билдирган.

У Ўзбекистон Республикаси президенти Шавкат Мирзиёевнинг туҳмат ва ҳақорат учун озодликдан маҳрум қилиш тарзидаги жазони бекор қилиш бўйича янги қонунни қабул қилишини, шунингдек блогерларга журналистларга бериладиган ҳуқуқлар берилишини олқишлаган. У ушбу масалада минтақадаги бошқа давлатларни ҳам Ўзбекистондан намуна олишга чақирган. 

Қолаверса, ЕХҲТнинг махсус вакили Миллий масс-медиани қўллаб-қувватлаш ва ривожлантириш жамоат фонди Васийлик Кенгашига Самарқандда Марказий Осиё судьяларининг мулоқотига кенг майдон яратиб бергани учун миннатдорчилик билдирган.

«ЕХҲТнинг ушбу баёноти Ўзбекистоннинг сўз эркинлиги борасидаги фаолиятига юксак баҳо ҳисобланади, бошқа давлатларни ҳам ўрнак олишга чақириш ҳолати камдан-кам бўлади», дея қайд этган Хушнудбек Худойбердиев.