Коронавирус туфайли НАТОнинг Норвегиядаги машғулотлари бекор қилинди

Фото: U.S. Marine Corps / Cpl. Brennon Taylor

НАТОнинг Норвегия шимолида бўлиб ўтаётган Cold Response халқаро машғулотлари коронавирус инфекцияси тарқалиши хавфи сабабли бекор қилинди. Бу ҳақда NRK телекомпанияси хабар берди.

"Биз ушбу даврда жамиятни қўллаб-қувватлаш учун мудофаа қобилиятимизни сақлаб қолишни истаймиз", - дея машғулотлар раҳбари Руне Якобсеннинг сўзларини келтирмоқда телекомпания.

Ҳозирга қадар бир нафар ҳарбийда коронавирус аниқланган, шундан сўнг у билан хизмат қиладиган 850 нафар ҳарбий карантинга жойлаштирилган. 8 март куни Финляндия ўзининг 400 нафар аскарини чақириб олишга қарор қилди. Машғулотларга АҚШ, Буюк Британия, Германия, Франция, Бельгия, Дания, Швеция ва Норвегиянинг 14 мингга яқин ҳарбий хизматчиси жалб этилганди.

Норвегияда кейинги суткаларда ушбу касалликка чалинганлар сони кескин ошди – сешанба якунланаётганида мамлакатда 277 кишида коронавирус аниқлангани хабар қилинган бўлса, бугун кун ярмига келиб касаллик юқтирганлар сони 430 нафарга етди.

Тайёрлаган Дилшод Аскаров

#НАТО #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.