Ўзбек тили, адабиёти ва фольклори институти тузилмасида Социолингвистика бўлими ташкил этилди

Вазирлар Маҳкамасининг ўзбек тили ва адабиёти бўйича фундаментал ва амалий тадқиқотлар самарадорлигини янада ошириш чора-тадбирлари тўғрисидаги қарори қабул қилинди.

Қарорга мувофиқ, Ўзбекистон Фанлар академияси Ўзбек тили, адабиёти ва фольклори институти тузилмасида Социолингвистика бўлими ташкил этилди.

Қуйидагилар институтнинг социолингвистика соҳасидаги қўшимча вазифалари этиб белгиланди:

ўзбек тилининг ривожланиши билан боглиқ фундаментал, амалий ва инновацион тадқиқотларни амалга ошириш ва кенгайтириш;
ўзбек тилининг давлат тили сифатидаги нуфузи ва мавқеини тубдан ошириш борасидаги илмий изланишларни кучайтириш;
ўзбек тилининг ёзма матни меъёр ва қоидаларини ишлаб чиқиш;
ўзбек тилининг изоҳли луғатлари, давлат тилида иш юритиш бўйича қўлланма ва адабиётлар тайёрлаш;
давлат тилини ривожлантиришга оид норматив-ҳуқуқий ҳужжатлар лойиҳаларини ишлаб чиқишда фаол иштирок этиш.

Ҳужжат билан, Ўзбекистон Фанлар академияси Ўзбек тили, адабиёти ва фольклори институтининг 2020-2022 йилларда ўзбек тили ва адабиётига доир фундаментал ва амалий тадқиқотларни амалга ошириш чора-тадбирлари режаси тасдиқланди.

Режада белгиланишича, Ўзбек тили, адабиёти ва фольклори институтининг тадқиқот мавзуларини қайта кўриб чиқилади ва тасдиқланади, ўзбек тилининг изоҳли луғатлари, таржима луғатлари, “Алишер Навоий ҳаёти ва ижодининг мукаммал энциклопедияси”, “Ўзбек адабиёти хазинасидан” деб номланган китоблар туркуми нашрга тайёрланади ва чоп этилади.

Халқ шевалари ва фольклори материалларини тўплаш мақсадида республика ҳудуди бўйлаб илмий экспедициялар ташкил этилади ва экспедиция давомида тўпланган халқ шевалари асосида “Ўзбек халқ шевалари” номли тўплам нашрга тайёрланади.