Украинага хорижликларнинг кириши тақиқланди

Украина коронавирус тарқалиши сабабли 2 кундан кейин хорижликлар учун чегарани вақтинчалик ёпишга қарор қилди.

Фото: EPA

Бу ҳақда Украина миллий хавфсизлик ва мудофаа кенгаши котиби Алексей Данилов шошилинч брифингда маълум қилди.

Украинага киришга тақиқлов 2 ҳафта амал қилади. Украина ташқи ишлар вазирлиги бошқа давлатларни чегараларини ёпиши ҳақида огоҳлантиради.

Даниловнинг таъкидлашича, хорижликларнинг киришига тақиқлов вазият қандай ривожланишига боғлиқ ҳолда узайтирилиши мумкин.

Ҳукумат, шунингдек, украиналикларга хорижга сафарларни чеклашни тавсия қилган. Хорижда бўлган украиналиклар эса уйга қайтишлари мумкин бўлади, бироқ улар қайтгач тиббий кузатув остига жойлаштирилади. Бир ҳафта ичида чегарадаги барча ўтказиш пунктлари касалланганларни аниқлаш учун тезкор тестлар билан таъминланади.

13 март куни Украинада коронавирусдан илк ўлим ҳолати қайд этилди. Касалликдан Житомир областида яшовчи аёл вафот этган.

Тайёрлаган Шуҳрат Раҳимов

#Украина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.