Россияда 350дан зиёд академик, сиёсатчи ва ёзувчилар конституцияга ўзгартиришлар киритилишига қарши чиқди

Россияда олимлар, юристлар ва адабиётчилардан иборат гуруҳ конституцияга ўзгартиришлар киритилишига қарши чиқиб, Конституцион судга жамоавий мурожаат билан чиқди. Мурожаат матни «Эхо Москви» сайтида эълон қилинди.

16 март эрталаб мурожаатга 357 киши имзо қўйганди. Рўйхат Россия фанлар академиясининг 18 нафар академик ва мухбир аъзоларидан бошланади, улар орасида лингвист Александр Аникин, физик и Макс Планк мукофоти лауреати Михаил Данилов, геохимик Юрий Костицын, тарихчи Аскольд Иванчик ва бошқа олимлар бор.

Мурожаатни шунингдек, иқтисодчилар Владислав Иноземцев ва Яков Уринсон, Олий иқтисод мактаби илмий раҳбари Евгений Ясин, сиёсатшунос Глеб Павловский, Борис Ельциннинг собиқ ёрдамчиси Георгий Сатаров, социолог Элла Панеях, шоир Лев Рубинштейн, ёзувчилар Алиса Ганиева ва Алексей Слаповский, журналистлар Светлана Сорокина ва Леонид Парфёнов, телебошловчи Михаил Ширвиндт ва бошқалар имзолаган.

«Биз мамлакатимизга чуқур конституцион инқироз хавфи таҳдид солмоқда деб ҳисоблаймиз», — дейилади мурожаатда. 

Мурожаатчилар хусусан, Валентина Терешкованинг президентлик муддатларини  бошидан ҳисоблаш таклифига қарши чиққан. Уларнинг фикрича, ўзгартиришлар конституциянинг ўзгартириб бўлмас бўлимларига зиддир.

Россия конституциясига тузатишлар киритиш тўғрисидаги қонун лойиҳаси Давлат думаси томонидан 11 март куни маъқулланди, худди шу куни у Федерациялар кенгаши томонидан қабул қилинди. Ўзгартиришлар, хусусан, Путиннинг президентлик сайловларида яна иштирок этишига имкон беради.

Россия президенти Владимир Путин ҳужжат расмий эълон қилинганидан кейин кучга кирадиган конституцияга тузатишлар киритиш тартибини тасдиқлади. Тузатишлар 22 апрелга белгиланган овоз бериш натижалари бўйича кучга киради.