Қирғизистон президенти коронавирус билан боғлиқ вазиятда интизомни сақлашга чақирди

“Интизомга амал қилиш – ушбу мураккаб кунларда ҳар биримизнинг фуқаролик бурчимиздир. Бу нафақат ўзи, балки ўз фарзандлари, ҳамюртлари ва бутун жамият соғлиғи, ҳаёти ва фаровонлиги учун масъулиятдир”, деб айтган Жээнбеков.

Унинг таъкидлашича, республикада коронавирусга қарши, озиқ-овқат ва биринчи эҳтиёждаги товарлар тақчиллиги юзага келмаслиги учун барча чоралар кўрилмоқда.

“Жорий мураккаб иқтисодий вазиятдан келиб чиқиб, ҳукумат томонидан кичик ва ўрта бизнеснинг алоҳида шароитларда ишлаши алгоритми ишлаб чиқилади. Зудлик билан инқирозга қарши комплекс режани қабул қилиш лозим. Биринчи эҳтиёждаги товарлар етказиб берувчиларга “яшил йўлак”ни таъминлаш керак”, деб таъкидлаб ўтган Жээнбеков.

Айни вақтда Қирғизистонда коронавирусга чалинганлар 44 нафарни ташкил қилмоқда. Республикада эпидемия сабабли фавқулодда вазият режими жорий қилинган. Шунингдек, бир қатор шаҳарларда, жумладан пойтахт Бишкекда фавқулодда ҳолат режими киритилган.