Саудия Арабистони бошчилигидаги коалиция яманлик ҳусийлар томонидан Саудия Арабистони пойтахти Ар-Риёдга ва Яман билан чегарасидаги Жизон шаҳрига учирилган иккита ракетани уриб туширди.
Бу ҳақда коалиция вакили полковник Туркий ал-Маликийга таяниб Sky News Arabia телеканали хабар берди.
“Сано ва Саъддан учирилган иккита ракета Ар-Риёд ва Жизон устида Саудия Арабистони ҳаво ҳужумига қарши мудофаа кучлари томонидан уриб туширилди. Жабрланувчилар йўқ”, деб маълум қилинган хабарда.
Ал-Маликийнинг таъкидлашича, ракеталар учирилишига ҳусийлар ва Эроннинг Ислом инқилоби муҳофизлари корпуси алоқадор бўлиб, бу ҳужум ушбу кучлар қандай хавф солишини кўрсатади.
Ўз навбатида Саудия Арабистони матбуот агентлиги ҳарбийларга таяниб, ҳавода йўқ қилинган баллистик ракеталар қолдиқларининг ерга тушишидан икки фуқаро енгил жароҳатлар олганини маълум қилган.