АҚШнинг Афғонистонга ёрдами 1 млрд долларга камайиши хавфсизлик кучларига таъсир қилади – Reuters

«Инклюзив ҳукумат» шакллантириш борасидаги музокаралар муваффақиятсиз тугагач, АҚШ томонидан Афғонистонга кўрсатиладиган молиявий кўмак ҳажми 1 миллиард долларга қисқартирилиши биринчи навбатда мамлакат хавфсизлик кучларига ўз таъсирини ўтказиши мумкин. Бу ҳақда Reuters АҚШ Конгресси ва Пентагондаги манбаларга таянган ҳолда хабар қилмоқда.

Конгресс аппаратида фаолият кўрсатадиган икки ходимнинг агентликка сўзлаб беришларича, АҚШ Давлат департаменти қонуншуносларни ҳажми 4,2 миллиард бўлган Пентагон жамғармаси қисқартирилиши борасида огоҳлантирган. Афғонистон хавфсизлик кучларининг таъминоти учун маблағ ҳам асосан шу фонддан ажратилади.

Маълумотларга кўра, Афғонистон хавфсизлик кучларининг йиллик бюджети – маошлар, озиқ-овқатлар ҳамда ёқилғи, асбоб-ускуналар ва инфратузилма учун харажатларнинг тўртдан уч қисми шу жамғарма ҳисобидан қопланиб келинган.

«Афғон хавфсизлик кучларини молиялаштиришни қисқартириш ғояси АҚШнинг миллий манфаатларига тамомила зиддир», – деган Конгресс вакилларидан бири.

Ўз навбатида, АҚШ Мудофаа вазирлиги вакили ҳозирча кўмакнинг қайси қисмини қисқартириш борасида якуний қарорга келинмаганини айтган. Унинг сўзларига кўра, Пентагондагилар айнан уларнинг жамғармаси кескин қисқартирилаётганидан қаттиқ ташвишда.

«Биз чиндан ҳам шундай бўлмаслигини истамоқдамиз», – деган Reuters суҳбатлашган Пентагон вакили.

АҚШ ҳарбий идорасининг вакилига кўра, ушбу қисқартириш Афғонистон хавфсизлик кучларининг «Толибон» радикал ҳаракатига қарши туриш қобилиятига жиддий зиён етказади.

«Уларда ўта жиддий муаммолар бошланади», – деган у.

Лекин, вазирлик вакили Афғонистоннинг хавфсизлик кучларини қўллаб-қувватлаш учун маблағларни қисқартириш маълум бир маънога эгалигини ҳам таъкидлаб ўтган. Бу орқали Вашингтон Кобулга босим ўтказа олади.

Март ойида Давлат департаменти матбуот хизмати АҚШ Афғонистонга молиявий кўмакни 1 миллиард долларга қисқартириш ниятида эканини эълон қилган эди.

Эълон қилинган ҳужжатда АҚШ Афғонистон президенти Ашраф Ғани ва бош вазир, президентликка номзод Абдулла Абдулла ўзаро «инклюзив ҳукумат борасида келиша олмагани»дан чуқур таассуфда экани айтилганди.

Баёнотда қайд этилгандики, Вашингтон «Афғонистон билан ҳамкорлик сарҳадларини қайта кўриб чиқиш» ниятида.

2020 йил 18 февраль куни Ашраф Ғани Афғонистонда ўтган президентлик сайловларида расман ғолиб деб эълон қилинди. Мустақил сайлов комиссиясининг якуний маълумотларига кўра, у сайловчиларнинг 50,64 фоизи овозини олган. Унинг асосий рақиби Абдулла Абдулла сайлов натижаларини тан олишдан бош тортди. «Толибон» вакиллари эса сайловни легитим эмас ва сулҳ жараёнларига зид келади, дея баҳолаган.