Францияда номаълум шахс одамларга пичоқ билан ҳужум қилди. Икки киши ҳалок бўлди

Франция жанубидаги Роман-сюр-Изере шаҳарчасида номаълум шахс одамларга пичоқ билан ҳужум қилди. Оқибатда икки киши ҳалок бўлиб етти киши жароҳат олди.

Фото: AFP

Маҳаллий вақт билан соат 11:00 атрофида номаълум шахс тамаки дўконига кириб унинг эгасига пичоқ билан ҳужум қилган. Дўкон эгаси бўлган эрига ёрдамга шошилган аёл ҳам номаълум кимсанинг пичоқ зарбидан жабрланган. Кейинчалик гўшт дўконига йўл олган шахс у ердан яна битта пичоқ олиб одамларга ташланади. Ҳужумга учраган харидорлардан бири воқеа жойида ҳалок бўлган.

Полиция қўлга олишга келганида одамларга ҳужум қилган шахс ўзини 1987 йил туғилган суданлик деб таништиради. У полицияга қаршилик қилмай ўзини ўлдиришларини сўрайди. Полиция суданлик эканини айтаётган жиноятчининг шахсини аниқлаштирмоқда. Иш юзасидан Лион полицияси суриштирув олиб бораяпти.

Франция президенти Эммануэль Макрон ҳалок бўлганларнинг оила аъзоларига ҳамдардлик бирдирди ва бу воқеа қандай содир бўлганига ойдинлик киритилишини айтди: «Мамлакат шундоғам қийин кунларни бошдан ўтказаётган вақтда Роман-сюр-Изерада содир бўлган воқеа қурбонларининг оила аъзоларига ҳамдардлик билдираман», деб ёзди Макрон твиттердаги саҳифасида.

Қуролли ҳужум оқибатида касалхонага олиб кетилган 7 кишининг 2 нафари оғир аҳволда экани айтилмоқда.