Францияда Шенген визаси олиш тартиби ўзгарди

15 июлдан бошлаб Франциянинг Москвадаги виза маркази Россия фуқароларидан Шенген визаси учун ҳужжатларни нотариал ишончнома орқали қабул қилмайди. Янги қоидаларга кўра, ҳужжатлар асосан шахсан ёки қонуний вакил ҳамда яқин қариндошлар орқали топширилиши мумкин.

Фото: AP

Россия туроператорлари ассоциацияси маълум қилишича, Франция охирги кунларда россияликлар учун виза тартибини кучайтирган Европа Иттифоқининг тўртинчи давлатига айланди. Бундан аввал Италия, Испания ва Венгрия ҳам шунга ўхшаш чекловларни жорий этган эди.

Янги тартибга мувофиқ, 15 июлдан бошлаб Москвадаги Франция виза маркази Шенген визаси учун ҳужжатларни нотариал ишончнома асосида қабул қилмайди.

Эндиликда ҳужжатларни олдиндан рўйхатдан ўтган ҳолда фақат визани расмийлаштираётган шахснинг ўзи, 18 ёшга тўлмаган болалар номидан уларнинг ота-онаси ёки қонуний васийси, шунингдек турмуш ўртоғи, фарзандлари ва ота-онаси топшириши мумкин.

Яқин қариндошлар орқали мурожаат қилинганда қариндошликни тасдиқловчи ҳужжатларнинг асл нусхаси тақдим этилиши шарт. Шу билан бирга, ариза берувчи сўнгги 59 ой ичида биометрик маълумотларини топширган бўлиши лозим.

Шунингдек, виза анкетаcи ариза берувчининг ўзи томонидан имзоланиши мажбурий ҳисобланади. 12 ёшдан катта барча мурожаатчилар учун биометрик маълумотларни топшириш талаби сақланиб қолади.

Аввалроқ Италиянинг Москвадаги виза марказида мурожаатлар сони кескин ошгани сабабли Шенген визасини расмийлаштириш муддати 60 кунгача, Испанияда эса 45 кунгача узайгани хабар қилинган эди. Венгрия эса Россиянинг Самара, Уфа ва Қозон шаҳарларида виза аризаларини қабул қилишни вақтинча тўхтатган.