Туркияда коронавирусга қарши вакцина ҳайвонларда муваффақиятли синалгани айтилмоқда

Турк врачлари янги турдаги коронавирусга қарши ўзлари ишлаб чиқаётган вакцинанинг жониворларда муваффақиятли синовини ўтказишди. Бу ҳақда Туркиянинг коронавирусни ўрганиш бўйича илмий қўмитасига аъзо Оташ Қора хабар берган.

Фото: REUTERS / Andreas Gebert

«Яхши янгилик бор. Лейкопластирдаги микроигналар ёрдамида жониворларга коронавирусга қарши антитаналар ҳосил қилувчи ва вируснинг ҳужайраларга бирикишининг олдини олувчи вакцина киритилди. Энди у инсонларни ҳам касалликдан ҳимоя қила олишини синаш вақти келди», – деб ёзган у Твиттердаги саҳифасида.

Айни вақтда коронавирусга қарши вакциналар Россияда сичқонлар, олакўзан ва маймунларда синалмоқда. Бу синовлар апрель ойи охирларида ниҳояланиши кутилмоқда. Шанба куни «Вектор» давлат илмий маркази бош директори Ринат Максютов хабар бергандики, бошланғич клиник тадқиқотлар 11 майдан, клиник тадқиқотлар 29 июндан бошланади.

Янги коронавирус чақирувчи касалликнинг авж олиши 2019 йилнинг охирида Марказий Хитойда илк марта қайд этилганди. Касаллик Жаҳон соғлиқни сақлаш ташкилоти томонидан 11 март куни пандемия деб тан олинди. Сўнгги маълумотларга кўра 1,26 миллион киши касалликка чалинган, вафот этганлар сони 68 минг кишидан ошган.

Тайёрлаган Шуҳрат Шокиржонов

#Туркия #вакцина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.