Италияда коронавирус юқтириш ҳолатлари камайгани маълум қилинди

Италияда коронавирус юқтириш билан боғлиқ ҳолатлар сони камаймоқда, деди мамлакат соғлиқни сақлаш вазирлиги олий институтининг юқумли касалликлар бўлими бошлиғи Жованни Рецца.

Фото: AFP

«Текислик» босқичидан сўнг биз пасайишни бошладик. Аммо эҳтиёткор бўлишимиз керак, келинглар, эрта-индин кутайлик, аммо вазият ўнгланаётганга ўхшамоқда", - деди у.

Шу билан бирга, Реццанинг сўзларига кўра, "юқиш ҳолатлари камайгани билан, вирус қолаверади", шунинг учун карантин чекловлари давом этиши зарур.

Аввалроқ мамлакат фуқаро мудофааси хизмати раҳбари Анжело Боррелли Италияда вирус юқтирганлар сони 135 мингдан ошганини, 24 мингдан ортиқ бемор тузалгани ва 17127 киши вафот этганини маълум қилганди. Бир сутка давомида 880 киши касаллик юқтирган бўлиб, бу 10 мартдан буён энг яхши кўрсаткич бўлди.

Тайёрлаган Дилшод Аскаров

#Италия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.