Макрон Францияда карантин нега 11 майга қадар чўзилганини тушунтирди

Франция президенти Эмманюэл Макрон мамлакатида коронавирусга қарши курашиш бўйича чеклов чораларини чўзди. У бу ҳақда душанба куни Франция аҳолисига телемурожаати чоғида айтди, деб ёзмоқда Liberation.

Мамлакатда яна 4 ҳафтага – 11 майга қадар ҳаракатланиш учун чеклов узайтирилади, давлат чегаралари ёпиқлигича қолади. «Бу вирус тарқалишини секинлаштришнинг ягона йўли»,– деган Макрон.

Унинг сўзларига кўра, мамлакатда COVID-19нинг тарқалишига қарши жорий этилган чоралар кучайтирилишига ҳам, юмшатилишига ҳам эҳтиёж йўқ. Агар эпидемияда пасайиш кузатилсагина, 11 майдан сўнг карантин бекор қилиниши мумкин. Бироқ шу санадан сўнг Францияда ўқув муассасалари янги ўқув йилига тайёргарлик кўришга улгуриб қолиш учун очилади. Оммавий жойлар ёпиқлигича қолади, маданий ва спорт тадбирларини ўтказиш июль ойининг ўрталаригача тақиқланади.

Франция етакчиси 8 миллион кишига тааллуқли бўлган ишсизларга ёрдам кўрсатишнинг янги чораларини ҳам эълон қилди. Хусусан, Макрон кредитлар бўйича янги муддат узайтиришлар, йиғимларни бекор қилиш ва иқтисодиётнинг коронавирусдан энг кўп жабр кўрган соҳаларига ёрдам ваъда қилди.

Францияда карантин 17 март куни эълон қилинган ва 15 апрелда якунланиши керак эди.

Бу орада Нигерия президенти Муҳаммаду Бухорий ҳам мамлакатнинг учта муҳим ҳудуди – пойтахт Абужа ҳамда Лагос ва Огун шаҳарларида карантин чекловларини 14 кунга узатириш ҳақида эълон қилди.