Ташкил этилган постларда нега қуролланган ҳарбийлар турибди? ИИВ ҳолатга изоҳ берди

АОКА ҳузуридаги штабда бўлиб ўтган брифингда Ички ишлар вазирлиги ахборот хизмати раҳбари Шоҳрух Ғиёсов Тошкент ва бошқа ҳудудларда ташкил этилган постларда нега қуролланган ҳарбийлар турганини тушунтирди.

“Ушбу зарурат, республикамиз ҳудудида коронавирус пандемияси тарқалиши билан боғлиқ вазиятда аввало, аҳолининг санитария-эпидемиологик осойишталигини таъминлаш ва мазкур касалликнинг мамлакатимиз бўйлаб кенг тарқалиб кетишини олдини олиш ҳамда назоратдан чиқмасликни таъминлаш мақсадида белгиланган чора-тадбирлардан биридир”, - деди у.

Ички ишлар вазирлиги вакили бу ҳолатни нормал қабул қилишни ҳамда белгиланган тартиб-қоидаларга тўлиқ риоя этган ҳолда, ўзингиз ва оилангиз хавфсизлиги нуқтаи назаридан ёндашишингизни маслаҳат берган.

Бундан олдин, карантин вақтида жазони ўтиш муддати тугаган маҳкумларни озодликка чиқариш кечиктирилмаслиги хабар қилинганди.