Мьянмада ЖССТ автомобилига ҳужум қилинди

Мьянмада номаълум кимсалар Жаҳон соғлиқни сақлаш ташкилоти автомобилига ҳужум қилди. Оқибатда 2 киши ҳалок бўлган.

Фото: Reuters

Бу ҳақда БМТ бош котиби расмий вакили Стефан Дюжаррик хабар қилган.

Унинг таъкидлашича, ҳужум Ракҳайн штатида 20 апрелда содир этилган. Автомобил коронавирусни аниқлаш учун намуналарни олиб кетаётган бўлган.

Ҳужум оқибатида автомобил ҳайдовчиси ва ЖССТ ходими ҳалок бўлган, маҳаллий амалдор яраланган.

БМТ бош котиби Антониу Гутерриш ҳужумни қоралаб, воқеани тўлиқ ва очиқ-ойдин тергов қилишга ва айбдорларни жавобгарликка тортишга чақирган.

Мьянма қуролли кучлари ва “Аракан роҳингяларини қутқариш армияси” ҳужумга алоқадор эмасликларини маълум қилишган.

Тайёрлаган Шуҳрат Раҳимов

#ЖССТ #Мьянма

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.