ЖССТ коронавирусга нисбатан иммунитет пайдо бўлиши ҳақидаги тахмин ҳозирча тасдиқланмаганини билдирди

Ўтган ҳафтада Чили ҳукумати коронавирусдан соғайган фуқароларга гувоҳнома беришни бошлаши хабар қилинганди. Мамлакат соғлиқни сақлаш вазирлигининг қайд этишича, уларда касалликка нисбатан иммунитет ҳосил бўлади, улар камида бир йил давомида коронавирус ташувчилари бўлишмайди.

Фото: Yves Herman / Reuters

Коронавирусдан соғайганларда унга нисбатан иммунитет пайдо бўлиши тўғрисидаги назария ҳали тасдиқланганича йўқ. Бу ҳақда Жаҳон соғлиқни сақлаш ташкилоти баёнотида маълум қилинди, деб хабар бермоқда Reuters.

Қайд этилишича, SARS-CoV-2 коронавирусидан антитаначаларга эга бўлганларнинг ундан ҳимояланганлиги ҳозирча тасдиғини топмаган. ЖССТ шу боис жаҳон мамлакатларини соғайганлар учун «иммунитет паспортлари» жорий этишдан огоҳлантирди. Ташкилотнинг билдиришича, бундай амалиёт инфекция тарқалиши хавфини ошириши мумкин.

Жонс Ҳопкинс университетининг маълумот беришича, дунё бўйича коронавирусга чалинганлар сони 2,82 миллиондан ошган, 197,5 минг киши вафот этган.

#ЖССТ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.