Сирдарёнинг талафот кўрган ҳудудларидаги 10200дан ортиқ истеъмолчи электр тармоғига қайта уланди

“Ҳудудий электр тармоқлари” АЖ матбуот хизматининг хабар беришича, ишчи-ходимлар жалб этилган махсус техникалар ёрдамида шикастланган электр тармоқларини реконструкция қилиш, яроқсиз ҳолга келганларини алмаштириш бўйича фаолиятни узлуксиз давом эттирмоқдалар. 

“Хусусан, Оқолтин туманининг табиий офат натижасида талафот етган “Шодлик” МФЙ аҳолисини электр энергияси билан таъминловчи 10 кВли “Истиқлол” ҳаво тармоғини текшириш ва зарар кўрган электр жиҳозларини янгилаш бўйича ишлар олиб борилди. Айни пайтда туман электр тармоқлари ходимлари томонидан сув босиш натижасида яроқсиз ҳолга келган “А.Таиров” нимстанциясида тозалаш ҳамда яроқсиз электр ускуналарини текшириш ишлари амалга оширилмоқда.

Мирзаобод туманидаги “Дўнгариқ”, “Янгийўл” МФЙлари ҳудудидаги хонадонлар ҳам офат натижасида электр энергиясидан узилиб қолган эди. Туман  электр таъминоти корхонаси малакали мутахассислари саъй-ҳаракати билан 4та трансформатор пункти таъмирланди. Шунингдек, “Ҳақиқат” МФЙ аҳолисини қайта электр энергиясига улаш мақсадида 35/10 ПС Тошкент 10 кВли “Дўнгариқ” ҳаво тармоғига қўшимча 1,8 км узунликдаги ҳаво тармоғи монтаж қилинди. Натижада мазкур маҳалла аҳолиси тўлиқ электр энергиясига қайта уланди”, дейилади хабарда.

Қайд этилишича, “Ҳудудий электр тармоқлари” АЖ томонидан олиб борилган ишлар натижасида шу кунгача 10200 дан ортиқ истеъмолчининг тармоққа қайта уланиши таъминланди.