Ўзбекистон бугун Россиянинг Санкт-Петербург шаҳридан 250 нафарга яқин фуқаросини Тошкентга олиб келади. Бу ҳақда Ўзбекистоннинг Россиядаги элчихонаси маълум қилган.
«Uzbekistan Airways сешанба куни чартер рейс орқали Тошкентдан Петербургга 41 нафар россияликни етказди. Чартер рейс уйга қайтишда Ўзбекистон фуқароларини олиб қайтади. Пулково аэропортидаги онлайн-таблога кўра, унинг парвози Москва вақти билан соат 13.30га белгиланган», дейилади хабарда.
Бу узоқ муддатли танаффусдан сўнг Россияга ташкиллаштирилган учинчи чартер рейс бўлди.
Ўтган ҳафталарда Uzbekistan Airways томонидан Ростов-Дон ва Қозонга чартер рейс амалга оширилиб, 191 нафар россиялик ватанига етказилган ва бу ҳудудлардан 520 нафар ўзбекистонлик Тошкентга олиб келинганди.
Эслатиб ўтамиз, шу йилнинг 16 мартидан Ўзбекистон халқаро авиақатновларни тўхтатганди. Шунингдек, темир йўл ва автомобил йўллари орқали Ўзбекистонга кириш ва чиқиш чекланган. Хорижликлар Ўзбекистон ҳудудига кириши ва ўзбекистонликлар хорижга чиқиши ҳам тўлиқ тақиқланган.
Президент Шавкат Мирзиёев 7 май кунги видеоселекторда хорижда 11 мингга яқин ўзбекистонлки қийин аҳволда қолгани ва улар «имкониятга қараб, барибир олиб келиниши керак»лигини айтганди.
Шундан сўнг 11 майдан 24 майга қадар Ўзбекистон фуқароларини хориждан олиб келиш бўйича 12та чартер рейс амалга оширилиши белгиланганди, шундан 7 та рейс Россиядаги ўзбекистонликларни олиб келиши режалаштирилган.
Хориждан қайтарилган барча фуқаролар 14 кундан кам бўлмаган муддатга карантин марказига жойлаштирилади.
