Хорижда карантинда сақланганлар Ўзбекистонга олиб келинганидан кейин яна изоляцияга олинадими? Мутахассис ойдинлик киритди

Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи, Республика бош давлат санитария инспектори Нурмат Отабеков хорижий давлатда бўлган вақтида 14 кунлик карантин муддатини ўтаган, шундан сўнг чартер рейс орқали Ўзбекистонга олиб келинган фуқаролар яна қайтадан изоляцияга олиниши ҳақидаги саволга жавоб қайтарди.

Унинг айтишича, хорижда карантинда бўлган, касаллик белгилари кузатилмаётган шахслар тиббий чекловлар тугаганидан сўнг 10 кун мобайнида уйида “ўзини-ўзини яккалаш” услубида изоляция қилинади. Мазкур жараёнда фуқарога бириктирилган тиббиёт ходими унинг ҳолатини телефон орқали суриштириб туради.

Нурмат Отабековнинг таъкидлашича, хорижда карантин муддатини ўтаганларнинг яна уй шароитида изоляция қилиниши коронавирус инфекциясининг яширин даври 14 кундан узоқ бўлиши мумкинлиги билан боғлиқдир.

Аввалроқ у хорижий мамлакатлардан чартер рейслар орқали олиб келинадиган фуқароларни кутиб олишга, уларнинг оила ъзолари ва яқинлари билан учрашишига рухсат берилмаслиги, улар аэропортнинг ўзидан тўғри карантин зонасига олиб кетилишини маълум қилган эди.