Бухоро вилояти масъуллари 5,3 мингдан зиёд ёшларга ўз ишини топиб бериши керак

Илк натижалар ёмон эмас: жорий йилнинг ўтган даврида вилоятда 11 минг 444 нафар ишсиз ёшлар доимий иш ўрни ва барқарор даромад манбаига эга бўлди. Йиллик режанинг 85,5 фоиздан ортиғи уддалангани эса дастлабки марра, холос. Эндиги вазифа карантин даврида иш ўрнини йўқотган ёки хориждаги муҳожирликдан қайтган 5,3 мингдан зиёд ёшларга ўз ишини топиб беришдан иборат.

Вилоятдаги ана шундай ишсиз ёшлар, улар билан ишлашга масъул мутасаддилар билан мулоқотда бу борада Бухорода ҳали ишга солинмаган имконият-у салоҳият катта экани таъкидланди. Уч кун ичида барча туман-шаҳарларда ўрганишлар олиб борилиб, иш берувчилар ва ишсиз ёшлар кооперациясини йўлга қўйишга киришилди.

Дейлик, айни пайтда катта қурилиш майдонига айланган Бухоро шаҳрининг ўзида кўп қаватли 157 та уй, 866 та савдо ва хизмат кўрсатиш объектлари қурилмоқда. Мана шу қурилиш жараёнининг ўзида эса қурилиш-пудрат ташкилотлари қарийб 430 дан зиёд бўш иш ўрнига эга: қай бирига ғишт терувчилар, кимгадир пайдвандчилар, яна бошқасига сувоқчилар керак. Вилоятда эса шу ишларни эплайдиган, хориждаги катта қурилиш майдонларида чиниққан ва айни пайтда ишсиз ёшлар кам эмас.

Илк мулоқот 82 та қурилиш ташкилоти раҳбарлари ва 180 нафар ишсиз ёшлар ўртасида кечди. Натижада дастлабки куннинг ўзида қарийб 100 нафар йигит шаҳардаги қурилиш объектларига ишга қабул қилинди. Бухоролик Жавоҳир Арабов ҳам айни тоғни урса талқон қиладиган ёшда. Пайвандчиликда тажрибаси бор, малакаси етарли. Анчадан бери муқим иш топа олмаётган Жавоҳир “Бухоро сити” лойиҳаси доирасидаги йирик савдо мажмуаси қурилишида ўз ишини топди.

Бу йил Бухоро шаҳридаги 866 та савдо ва хизмат кўрсатиш объектлари қурилиб, ишга туширилгач, минглаб янги иш ўринлари яратилади. Биргина мана шу “Бухоро сити” таркибидаги “Karvon shopping” савдо мажмуасида 3 мингга яқин доимий иш жойи очилади. Уларнинг аксариятида ёшлар иш бошлайди.