Касалланиш кўрсаткичлари юқори бўлса ҳам карантин чоралари юмшатилаётганига изоҳ берилди

Коронавирус билан касалланиш ҳолатлари кунлик 5-10та бўлган даврда мамлакатда қатъий карантин чоралари амалга киритилди. Аммо кунлик касалланиш кўрсаткичи бир неча ўн нафар бўлган пайтда карантин юмшатилмоқда.

Коронавирусга қарши кураш штаби аъзоси Ҳабибулла Оқилов АОКАда ўтказилган брифингда шу масалада изоҳ берди.

«Коронавирус билан оғриган биринчи бемор аниқланиб, кунлик ўсиш ҳолатлари кузатилганда қатъий карантин чоралари бир маромда сақлаб турилди. Кейинчалик касалликдан тузалганлар кўрсаткичи янги касалланганлар сонидан юқорилиги 2 ҳафтадан ортиқроқ вақт давомида барқарор сақланиб тургач, карантинни босқичма-босқич юмшатиш чоралари кўрила бошланди.

Бу беморлар учун даволаш койкалари, мутахассислар ва медикамент воситаларининг етарли захираси мавжудлиги билан изоҳланади.

Фурсатдан фойдаланган ҳолда аҳоли карантиннинг юмшатилишини тўғри тушуниши кераклигини айтиб ўтмоқчиман. Карантин чораларининг юмшатилаётгани унинг бекор бўлишини англатмайди – вазият ёмонлашган тақдирда керакли чоралар кучайтирилади», дея Оқиловнинг сўзларини келтирмоқда Kun.uz мухбири.