Boeing Норвегия авиакомпанияси билан тузилган 10,6 млрд долларлик шартномани қўлдан чиқарди

Норвегиянинг Norwegian Air авиакомпанияси АҚШнинг Boeing компанияси билан тузилган 10,6 млрд долларлик шартномани бекор қилди.  

Bloomberg ахборот агентлигининг хабар беришича, авиакомпания Boeing’га 97 та самолёт хариди учун тузилган келишувни бекор қилганини маълум қилган. Шартнома доирасида авиакомпания 92 та Boeing 737 Max ва 5 та Boeing 787 Dreamliner самолёти олиши керак бўлган.    

Таъкидланишича, авиакомпания коронавирус пандемияси сабабли рейслар бекор қилингандан кейин реструктуризация ўтказмоқда ва етказиб берилмаган самолётлар учун тўланган пулларнинг қайтарилиши бўйича судга ариза топширган.

Бундан ташқари, Norwegian Air АҚШ компаниясидан Boeing 737 Max самолётлари билан 2 та авиаҳалокат юз бергандан кейин уларнинг парвози тўхтатилгани учун компенсация олишни мўлжалламоқда.