АҚШда бир кунда 57,5 минг кишида коронавирус аниқланди. Рекорд янгиланди

Флоридада сурункасига 26 кундан буён касаллик юқтирганлар аниқланиши бўйича кунлик рекорд янгиланмоқда.

Фото: Andrew Caballero-Reynolds/AFP/Getty Images

3 июль куни АҚШда коронавирус юқтириш билан боғлиқ 57 497та янги ҳолат қайд этилди. Бу ҳақда The Washington Post хабар бермоқда.

Нашрнинг ёзишича, аввалги максимал кўрсаткич - 55 220 та ҳолат 2 июль куни қайд этилганди. Охирги тўққиз кун ичида янги ҳолатлар бўйича антирекорд етти марта янгиланди.

Газетанинг маълумот беришича, суткалик ўсиш бўйича рекордлар камида йигирмата штатда қайд этилган. Флоридада сурункасига 26 кундан буён касаллик юқтирганлар аниқланиши бўйича кунлик рекорд янгиланмоқда.

COVID-19 тарқалиши авж олишига қарамасдан, АҚШ президенти Дональд Трамп Жанубий Дакотадаги мустақиллик куни байрами тадбирини бекор қилмади.

Жонс Ҳопкинс университети маълумотларига кўра, АҚШда коронавирус юқтириш бўйича 2,8 млн ҳолат аниқланган, 129 мингдан ортиқ киши вафот этган.

Тайёрлаган Дилшод Аскаров

#АҚШ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.