Фаластин коронавирус сабабли Исроилни чегарани ёпишга чақирди

Фаластинда коронавирус юқтириш билан боғлиқ ҳолатларнинг 18 фоизи Исроилда ишлайдиган фаластинликларда, қолган 82 фоизи эса улар билан мулоқотда бўлганларда аниқланган.

Фото: REUTERS

Фаластин бош вазири Муҳаммад Штайе коронавирус сабабли Исроилга назорат-ўтказиш пунктлари ва чегарани ёпиш чақириғи билан чиқди.

"Фаластин маъмурияти Исроилни Фаластин ҳудудлари билан назорат-ўтказиш пунктлари ва чегараларни ёпишга чақиради. Биз бу ишни назорат қилиш бўйича БМТга сўров юборамиз", - деди Штайе.

Унинг сўзларига кўра, мамлакатда коронавирус юқтириш билан боғлиқ ҳолатларнинг 18 фоизи Исроилда ишлайдиган фаластинликларда, қолган 82 фоизи эса улар билан мулоқотда бўлганларда аниқланган.

Штайе назорат-ўтказиш пунктлари ва чегараларда назоратнинг йўқлиги Фаластинда COVID-19га чалинишнинг асосий сабаби эканлигини таъкидлади.

Фаластин бош вазири вирус тарқалишининг олдини олиш учун аҳолини тўй-тантаналар ўтказмасликка чақирди. У шунингдек, Исроилда ишлайдиган фаластинликлардан иш жойларида қолиш ҳамда Фаластинга келмасликларини сўради.