АҚШда сўнгги суткада рекорд сонда касалланганлар қайд қилинди

АҚШда бир суткада коронавирусга чалинишлар сони бўйича янги антирекорд қайд қилинди. Мамлакатда сўнгги суткада коронавирус 71389 кишида тасдиқланган.

Фото: Reuters

Bloomberg ахборот агентлигининг хабар беришича, янги касалланиш ҳолатлари сони аввалги кунгига нисбатан 2,3 фоизга ортган.

Умуман олганда, охирги ҳафта давомида ўсиш ўртача 1,9 фоизни ташкил қилган. Шунингдек, мамлакатда коронавирусдан ўлим ҳолатлари сони 0,1 фоизга ортган.

Бруклин марказий шифохонасида ишловчи россиялик реаниматолог Евгений Пинелиснинг таъкидлашича, АҚШ тиббиёти коронавирус эпидемиясига тайёр бўлмаган. Унинг айтишича, АҚШдаги соғлиқни сақлаш тизими жиддий силсилаларга мослашмаган. Хусусан, аҳолининг кам таъминланган қатлами ҳукуматнинг эпидемияга қарши қаратилган чораларига жиддий муносабатда бўлмаган. Бундан ташқари, улар масофадан ишлаш имкониятига эга эмаслар ва шаҳардан-шаҳарга кўчиб юришга мажбурлар.

Охирги маълумотларга кўра, АҚШда коронавирусга чалинганлар сони 3,35 млндан ошиб кетди, ундан вафот этганлар сони 137 мингдан кўпроқни ташкил қилмоқда. Шу билан бирга, 1,5 млнга яқин одам касалликдан соғайиб кетган.

Тайёрлаган Шуҳрат Раҳимов

#АҚШ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.