АҚШ бош прокурори IT-компаниялар ва Ҳолливудни Хитой олдида тиз чўкишда айблади

Бош прокурор Disney компанияси 1990-йилларда Далай-лама ҳаёти ҳақидаги «Кундун» фильми учун Хитойнинг талаби билан узр сўраганини эслатди.

Уильям Барр / Фото: Win McNamee / Getty Images

АҚШ бош прокурори Уильям Барр Американинг йирик компаниялари, жумладан Google ва Apple компанияларини Хитой билан ҳамкорлик қилишни хоҳлашда айблади.

У Ҳолливудни мисол қилиб келтирди ва у ердаги компанияларни Хитойнинг розилигини олиш учун фильмларни цензура қилишда айблади. Бош прокурор Хитой олдида «тиз чўккан» биргина Ҳолливуд эмаслигини таъкидлади.

«Google, Microsoft, Yahoo ва Apple каби компаниялар йиллар давомида Хитой билан ҳамкорлик қилишга катта иштиёқ намойиш этди», — деди Барр.

У Apple Хитойнинг талаби билан айрим иловаларини ўчириб ташлаганини мисол қилди.

Бош прокурор шунингдек, Disney компанияси 1990-йилларда Далай-лама ҳаёти ҳақидаги «Кундун» фильми учун Хитойнинг талаби билан узр сўраганини эслатди. Шундан сўнг компания Шанхайда тематик парк очган.

«Паркнинг 11 минг ходимидан 300 нафари Хитой коммунистик партиясининг фаол аъзолари ҳисобланади», — деди Барр.