Пентагон Эрон самолёти билан юз берган можарони изоҳлади

АҚШ Ҳарбий ҳаво кучларининг F-15 қирувчи самолёти Эрон йўловчи самолётини халқаро меъёрларга мувофиқ 1 км узоқликда кузатиб борди, дейилади АҚШ марказий қўмондонлиги (CENTCOM) матбуот хизмати хабарида.

«F-15 қирувчи самолёти Суриядаги коалиция ҳаракат қилувчи Ат-Танф гарнизони осмонида оддий ҳаво миссиясини бажарди ва Mahan Air авиалайнерини тахминан 1000 метрлик хавфсиз масофадан кўздан кечирди. Бу Ат-Танф гарнизонидаги ходимларнинг хавфсизлигини таъминлаш мақсадида амалга оширилди», — дейилади қўмондонлик баёнотида.

Қайд қилинишича, F-15 учувчиси самолётнинг Mahan Air авиакомпаниясига тегишли йўловчи лайнер эканига ишонч ҳосил қилганидан сўнг, хавфсиз масофага узоқлашган.

АҚШ қўмондонлиги «кўздан кечириш жараёни халқаро меъёрлар доирасида профессионал даражада олиб борилгани»ни таъкидлади.