Борис Жонсон Европада коронавируснинг иккинчи тўлқини бошланаётганини айтди

Аввалроқ ЖССТнинг Европадаги минтақавий бюроси директори Ханс Клюге Европа мамлакатлари коронавирус инфекциясининг иккинчи тўлқинига тайёргарлик кўришлари кераклигини айтганди.

Фото: EPA-EFE/ANDY RAIN

Буюк Британия бош вазири Борис Жонсон Европа мамлакатларида коронавирус эпидемиясининг иккинчи тўлқини аломатлари сезилаётганини қайд этди. У бу ҳақда Sky News телеканалига берган интервьюсида айтди.

"Европада, айрим дўстларимиз орасида нима юз бераётганини очиқ айтайлик. Айрим жойларда пандемиянинг иккинчи тўлқини аломатларини кўра бошлаяпмиз деб қўрқаман", - деди у.

Жонсон 26 июлдан бошлаб Испаниядан келганлар учун икки ҳафталик мажбурий карантин жорий этилганлигини ёқлашини айтди. Бу таътилни Испанияда ўтказиш учун жўнаб кетган британияликлар учун кутилмаган ҳол бўлди.

Аввалроқ Бельгия ҳукумати 17 июлдан 23 июлгача касалланиш ҳолатлари 71 фоизга ўсганлиги сабабли қатъий карантин жорий этилиши мумкинлигини маълум қилганди.

Испаниянинг Каталониясида ҳам чекловлар қайтадан жорий этилиши мумкинлиги айтилмоқда.

Жаҳон соғлиқни сақлаш ташкилотининг Европадаги минтақавий бюроси директори Ханс Клюге ҳам Европа мамлакатлари коронавирус инфекциясининг иккинчи тўлқинига тайёргарлик кўришлари тўғрсида The Daily Telegraph газетасига берган интервьюсида айтиб ўтганди.

Тайёрлаган Дилшод Аскаров

#Европа #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.