Отабек Назиров иқтисодиётни сақлаб қолиш учун олтин валюта захирасини сотишни таклиф қилди

«Олтин нархи энг баланд даражада, иқтисодий фаоллик эса тушган, иқтисодиётни кейинги пасайиш ва ишсизлик ортишидан зудлик билан қутқариш учун айнан ҳозир олтин валюта захирасини сотиш ва маблағлардан фойдаланиш керак деб ўйлайман», деб ёзади олтин нархининг ўсишини изоҳлаган ҳолда Назиров.

Олтин нархи йил бошидан бери ўсишда давом этмоқда. У ўзининг тарихий рекордини ўрнатган ҳолда октябрь ойи фьючерслари бўйича илк марта 1 унция учун 2000 доллар кўрсаткичидан ошди.

Қимматбаҳо металнинг нархи сўнгги уч йилда долларнинг энг кучли ойлик пасайиши фонида рекорд даражадаги ўсишни намойиш этди. Таҳлилчилар қимматбаҳо металл ўсишда давом этишини тахмин қилишмоқда.

2020 йил 1 июль ҳолатига кўра, Ўзбекистоннинг расмий захира активлари 32,3 млрд долларни ташкил этди. Захиранинг катта қисми – 19,4 млрд доллар монетар олтин ва 12,4 млрд доллар хорижий валютада сақланади. Жорий йил бошида мазкур кўрсаткич 29,2 млрд долларни ташкил қилган.