Ливан ҳукумати намойишлар ортидан истеъфога чиқди

Ливан ҳукумати истеъфога чиқди, деб баёнот берди соғлиқни сақлаш вазири Ҳамид Ҳасан LBC телеканали эфирида.

Вазирлар Маҳкамасида ўтказилган йиғилишдан сўнг, Зейна Акр Мудофаа вазири курсисини тарк этган. Аввалроқ, ҳукуматнинг бир неча вакили истеъфо ҳақида баёнот берган эди. 10 август куни кечқурун бу масала бўйича бош вазир Ҳасан Диаб ҳам баёнот бериши кутилмоқда.

Ҳукуматнинг тўлиқ таркибда истеъфога чиқиши Байрут аҳолиси талабларидан бирининг бажарилишини англатади.

Байрут портидаги кучли портлаш 4 август куни содир бўлди. Натижада, шаҳарга жуда катта зарар етказилди, 4 мингдан ортиқ одам жабрланди, 300 мингдан ортиғи уйларидан маҳрум бўлди, 200га яқин инсоннинг жасади топилди.

7 августдан бошлаб ливанликлар норозилик намойишига чиқишди, кейинчалик бу оммавий тўқнашувларга айланиб кетди. Намойишчилар полицияни тошбўрон қилишди, петардаларни отишди, бунга жавобан, полиция кўзни ёшлантирувчи газга эга гранаталарни улоқтирди. Намойишчилар бир қанча талабларни қўйишди, жумладан, парламентни тарқатиб юбориш, ислоҳотларни ўтказиш ва ҳ.к.

Жума куни улар 4та вазирликнинг биносини эгаллашди, аммо кейинчалик ҳарбийлар уларни ҳукумат идораларидан сиқиб чиқаришга муваффақ бўлишди. 

Ички ишлар вазирлиги хабарига кўра, тартибсизликлар оқибатида хавфсизлик хизматининг бир ходими ҳалок бўлди, 700дан ортиқ киши жароҳатланди.