Коронавирусдан тузалиб чиққанлар учун реабилитация марказлари ташкил этилади

Ўзбекистонда жамоавий иммунитет шаклланиши назорат остига олинади. Шунингдек, коронавирусдан тузалганлар учун реабилитация марказлари очилади.

«Республика махсус комиссиясига ҳар бир фаолият тури бўйича қандай санитария талабларига амал қилиш зарурлигини аниқ белгилаш вазифаси қўйилди. Эпидемиологик вазият яхши бўлган давлатлардан келган шахсларни карантинига олиш ва ундан чиқариш тартибини енгиллаштириш, пневмониядан тузалган аҳолини реабилитация қилиш марказларини ташкил этиш бўйича топшириқ берилди», дейилади президент матбуот хизмати хабарида.

Санитария-эпидемиология хизматига коллектив иммунитет шаклланиш жараёнини мониторинг қилиб бориш учун антитаначалар таҳлилини ўтказишни йўлга қўйиш кераклиги таъкидланган.

Эслатиб ўтамиз, Ўзбекистонда карантин 15 августдан босқичма-босқич юмшатиб борилади. Хусусан, шахсий ва жамоат транспорти ҳаракати, қатор фаолият турлари, бозор ва маданий-маърифий муассасалар иши босқичма-босқич қайта тикланади. Автотранспорт воситаларининг кун давомида юриши, маҳаллий авиа ва темир йўл қатнови учун рухсат берилади, белгиланган талабларга амал қилган ҳолда уйда 30 кишилик оилавий маросимлар ўтказиш мумкин бўлади.