Россиянинг коронавирусга қарши биринчи вакцинасининг халқаро синовлари кейинги ҳафтадан бошланади

Н.Гамалея номидаги марказ томонидан коронавирусга қарши ишлаб чиқилган вакцина “Спутник V”нинг халқаро клиник синовлари бошланмоқда. Вакцина синовларнинг якуний 3-босқичида 40 минг одамда синовдан ўтказилади. Бу ҳақда Россиянинг тўғридан-тўғри инвестициялар жамғармаси раҳбари Кирилл Дмитриев маълум қилди.

Фото: RDIF / HANDOUT

Синовлар Россиядан ташқари, Саудия Арабистони, БАА, Филиппинда ўтказилади. Шунингдек, кейинги ҳафтадан бошланадиган синовларда Бразилия ва Ҳиндистоннинг иштирок этиши имконияти кўриб чиқилмоқда.

Синовлар билан параллел равишда вакцина билан хавф гуруҳига кирувчи тиббий ходимлар ва ўқитувчилар эмланиши бошланади.

Гамалея номидаги марказ ходими Денис Логуновнинг таъкидлашича, вакцина алоҳида тартиб асосида рўйхатдан ўтказилган. Бундаги шартлардан бири вакцина синовларининг кўп сондаги иштирокчилар билан давом эттирилиши бўлган. “Натижада биз биринчи икки босқичда вакцинанинг иммуногенлик ва хавфсизлик даражаси юқорилиги ҳақида олинган маълумотларни нафақат яна бир бор тасдиқлашимиз, балки унинг эпидемиологик самарадорлигини баҳолашимиз керак бўлади”, деб қўшимча қилган Логунов.

Янги вакцина чиқарилишининг бундай тартиби уни коронавирусдан ҳимояга энг кўп эҳтиёжманд бўлганларда қўллашни бошлашга имкон берган. Бундай рухсат берилиши учун вакцинани ишлаб чиққан ва уни қўллашни маъқуллаган мутахассислар вакцинанинг хавфсиз ва самарали эканига ишончлари комил бўлиши керак бўлган.

Таъкидланишича, Гамалея номидаги марказда ҳам, вакцинанинг ишлаб чиқилишига сармоя киритган Россиянинг тўғридан-тўғри инвестициялар жамғармасида ҳам бунга шубҳа йўқ: олимлар томонидан вакцинани яратишда яхши ўрганилган ва хавфсиз технология қўлланган.

Тайёрлаган Шуҳрат Раҳимов

#вакцина #Россия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.